Daydi naipadpaduma a lakay agpagnapagna kadagiti lanlansangan, a kas la awan ti inna ikankano.
Iso, maysa a lakay a nagadal iti Pilosopia, a dina tinuloy ti adalna, gapo iti panagtungpalna iti sao daydi baket a inana, ket saan a gapo iti kaawan ti mabalinna a busbusen wenno kabaelan; gapo ket di ta baknang daydi inana, ken gapo ta kunkunada a nasaririt. Daydi naimbag a baket nagbuteng a ti anakna agbalin a masirib ket inna lipaten ti Dios, iso ti gapona nga inna pinagpili iti inna panagpadi wenno iti inna panangpanaw iti Kolejio de San Jose. Iso, ta adda ay-ayatenna, kinaykayatna ti nagsardeng nga agadal, ket nakiasawa. Piman ta nabalo ken naulila iti awan pay nakatawen, sinapulna ti liwliwana kadagiti pagpagbasaan, tapno mailisi iti ladingit, iti pallutan ken iti kinabayanggudaw. Ngem napalalo nga ayatna a nagadal ken naggatgatang kadagiti pagpagbasaan, ta nabaybay-anna a naminpinsan dagiti kukkukuana ket nain-inot a nagpanglaw.
Dagiti addaan iti nasayaat a sursuro naganenda iti Don Anastasio wenno pilosopo Tasio, ket dagiti dakes ti sursuroda, nga isuda dagiti ad-ado naganenda met iti Tasio a mauyong, gapo kadagiti naidumduma a panpanunotna ken nailanglangitan a pannakisasaona kadagiti tattao. Kas nasaumi, iti daydi a malem umasideg ti dawel; agkimkimaten iti sumagmamano ket raniaganda iti nakapoy a lawag da ti ngumisit a langit; nadagaang ket ti angin napalalo a nagpudot.
Ni pilosopo Tasio kasna nalipatanen daydi ay-ayatenna a bangngabangnga; ita umis-isem a kumitkita kadagiti nangisit a ululep. Iti asideg ti simbaan nakasabat iti maysa a tao a nakachaketa iti alpaka, nga adda binitbitna a nasurok a sangaarroba a kandela, ket nagbaston iti binurlasan, tanda ti turayna.
