Dagiti gurgurroud addani ti panagunida, arigna la tay agsisinnakayda, ket tunggal maysa paunaan ti nakabutbuteng a paikut-ikot dagiti salsal-it: mabalin a kuna ti Apo inna isursurat ti nagan Na ket apoy ti pagsurat Na ket ti agnanayon a langit adda nga agpigpigerger iti butengna. Ti tudo kas la agibuybuyat, ket gapo ta ablatan ti angin, a nakabutbuteng met ti sagawisiwna kas la itay napaang-ang a sabasabali ti turungenna. Dagiti kamkampana, nga awengda ti nalapunos iti buteng, ipangngegda ti naliday nga asogda, ket iti nabiit a ulimek a panagsardeng ti natbag a danarudor dagiti naparuk-atan a taktakiag ti Nakaparsuaan, maysa a naliday nga aweng ti kampana ti agsenna-ay a makasangsangit, kas la maysa nga unnoy.
Iti maikadua a tukad ti pagkampanaan iso ti yan dagidi dua nga ubbing a nakitatayo a nakisao iti daydi pilosopo. Ti inaudi, a dagiti matmatana, dadakkelda a nangisit, ket ti rupana, managbutbuteng, ikagkagumaanna nga ti bagina iti kabsat na, a kaas-aspingna unay, isuna la a ti panagkitkitana, naun-uneg ket ti langana, nabilbileg. Isuda a dua nakaaruatda iti nakurapay unay a napunno kadagiti sarsarait ken taktakop. Nagtugawda iti maysa a kayo, ket tunggal maysa adda igiggamanna a tali, a ti murdongna adda iti maikatlo a tukad, sadi ngato a nasipnget. Ti tudo, nga iduron ti angin, dumanon kadakuada ket puyupuyenna ti segged ti maysa a rungrong ti kandela a naitugkel iti rabaw ti maysa a bato a dakkel, a no iti Biernes Santo, iso ti ipalligayda iti koro tapno matulad ti uni ti gurru-od.
—¡Gutadem ta talim, Crispin! —kinuna daydi inauna iti adina.
Toy nagbitin iti tali, ket sadi ngato adda nangngeg a nakapoy nga asog, a linemmes a dagos ti uni ti gurruod a nagkalingaggag iti namenribo.
