—Dikay agdanag, appo,— kinuna daydi lakay nga agbangbangka; —no adda maysa ditoy a probinsiá a makabalin a mangaramid, iso, awan sabali.
—¿Ania ti nagan dayta a bumaro? —sinaludsudda.
—Naganenmi iti Mangyurit (Piloto): iso ti kalaingan a nakitak; isuna la a dina kaay-ayo toy a pagsapulan.
Ti danom agkuti, ti danom aggaraw: kasla adda gubal iti lansadna; ti alad magunggon. Isuda amin nagulimekda, dida pay umangesen. Ni Ibarra pinetpetanna, a sipipigerger ti putan ti nadawis a imukona.
Ti gubal kasla nalpasen. Idi kuan, timmaod ti ulo daydi bumaro, a kinablaawanda iti naragsak a dir-i: dagiti matmata dagiti babbai namsekda iti lua.
Ti mangyurit kimmalay-at a siiggem ti maysa nga imana iti murdong ti tali, ket idi adda iti sinanbansagen, inna inunos.
Timmaod ti buaya: ti tali naipulipol a kas la naibarakang iti tengngedna ken iti baba dagiti saksakana a pakauna. Dakkel, kas inpakdaar ni León; burikburikan, ket iti bukotna aduda. dagiti nagtubo a lumlumot a naganos, a iso ti pannakauban dagiti buaya, no tattao da kuma. Agem-emmak a kasla nuang, inna yapli-aplit ti iposna iti alad a kawayan, pasaray kaptenna ida, ket inna iñgañga ti nangisit ken dakkel a ngiwatna, nga ipakitana dagiti atitiddag a sasaóngna.
Ti mangyurit, maymaysa a mangun-unos; awan makalagip a mangbadang kenkuana.
Idi naisang-at ti buaya ket naikabilen iti sinanbansag, ti mangyurit inna inpayat; iti napigsa nga imana inna pinagkaem dagiti dadakkel a sangsangina, ket kinayatna a rineppet ti sungona iti nalagda a galot. Ti buaya inpakatna ti maudi a pigsana, pinagbikkungna ti bagina, pinakpak na ti datar iti napigsa nga iposna, ket nagtapuak iti danaw, iti ruar ti pasabing, ket inuludna ti nangtiliw kenkuana. Ti mangyurit nalpas a natayen; maysa nga ikkis ni kigtot ti rimuar kadagiti amin a barbarukongda.
Napordas a kasla sal-it, nagtapuak ti sabali a bagi iti danom; apaman la a nailasinda nga iso ni Ibarra. Ni María Clara saan a
nadasay, ta dagiti Filipina dida pay ammo ti maidasay.
