ngem awan duadua nga am-ammo idan dagiti agtaytayab a babassit
a kas balitok ti kitada, dagiti kulkulibangbang a nadumaduma ti
kadakkel ken buyada, adda balbag ken balitok, adda puraw ken
nangisit, adda naturikturikan, adda naraniag, adda balbag a ngumisit, a kasla adda rubi ken esmeralda a naikapet kadagiti paypayakda, ken dagiti rinibribo a kalkalammot a sumilapsilap, kas
da nawarsian iti mukumok. Ti aweng ti panagtayabda, ti iri
ti kundidit nga agririari iti aldaw ken rabii, ti sagawisiw ti tumaytayab, wenno ti namaga a reppaak ti nagango a sanga nga agtinnag
nga awan la ti dina pakaisalsalatan, isuda laeng ti mangriribok iti
ulimek daydi nalmeng a disso.
Nabayag bassit a nagnagna iti yan dagiti nasamek a ruruot nga agkalkalatkat, gapu ta inna lisian dagiti sisiit a maisabit iti abitona a ginggon a kasda itay igawid, ken dagiti ramramot dagiti kaykayo nga agrungrungarong iti daga, isuda a no manen inna pakaitigkulan daydi saan a narnaruam a magmagna. Pagammuan, nagsardeng a dagos: naragsak a pagpagaak ken nasantak a timtimek ti dimmanon kadagiti laplapayagna, ket dagidi timtimek ken pagpagaak aggapuda iti waig ket umas-asidegda nga umas-asideg kenkuana.
—Kitaek man no makasarakak iti umok,—kinuna ti maysa a timek a naimnas ken nasam-it nga am-ammo ti kura;—kayatko kuma a kitaen ni ... a daytay iso dinak makita, kayatko kuma a sursuruten iti amin a yan.
Ni Padre Salvi naglemmeng iti likudan ti maysa a dakkel a puon ti kayo ket immallingag.
—¿Kayatmo a sawen a kayatmo nga aramiden kenkuana ti ar-aramiden kenka ti kura, nga iti amin a yan innaka sisi-imen?— insungbat ti maysa a timek a naragsak. —!Agan-annadka, ta ti imon mamagkuttong ket lumnek dagiti matmata!
—¡Saan, saan a imon, gagar laeng!—insungbat daydi timek a naimnas, kasla aweng ti pirak, ket daydi naragsak inna met tilulitan:
—¡Wen, imon, imon!—ket nagkatawa a nagpagaak.
—No kuman agimunak, saan a siak ti di agpakita kenkuana,
no di ket iso ti innak ilemmeng, tapno awan makakitkita kenkuana a sabali.
