lemmenganna ket kimmita iti lawlawna a kas la nayaw-awan
dagiti matmatana. Nagsardeng a di nakakuti, sa immaddang
iti surnagmamano a kas ket itay kayatna a suruten dagidi babLalasang, ngem idi kuan, nagsubli, ket namaraigid iti waig a nangsapol kadagiti dadduma a napan nakirambak.
Iti saan unay nga adayo iti yanna, adda nakitana iti tengnga ti waig a kas la pagdigdigusan, nasayaat ti pannakalakobna, ket ti pannakaatepna, maysa a kinawayanan a narukbos: iti daydi nga abong adda mangeg a naragsak a timek ti babai. Naramenan kadagiti bulbulong dagiti bubua ken niniog, sabsabong ken parparaypay. Iti ad-adayo, adda nakitana a maysa a rangtay a kawayan, ket iti ad-adayo pay nakitana dagiti lallaki nga agdidigos, ket dagiti met sangaarban a babaunen, lallaki ken babbai, addada a kumaribuso iti lawlaw dagiti naaramid a pagdalikanan, adda agidutdutdot iti manok, adda agar-arasaw iti bagas, adda agas-asar iti letson, ken no ania pay. Ket sadiay, iti baliw a igid, iti maysa a disso a nagat-ikan, iso ti yan dagiti ado a lallaki ken babbai iti linong ti maysa a sapaw a lupot, a naibitin kadagiti sangsanga dagiti lallakay a kaykayo ken kaikkabkabil a paspasok. Sadiay addadan a naum-ummong dagiti alperes, koadjutor, gobernadorsilio, ti tenientemayor, ti mangisursuro ken ado a ka-kapitan kada te-teniente pasado, pati pay ni Kapitan Basilio, nga ama ni Sinang, daan a kasubang daydi nagawan a Don Rafael iti maysa a nabayagen a ringgor. Kinuna ni Ibarra: “Pagsusikantayo ti maysa a kalintegan, ket ti panagsusik saanna a kayat a sawen ti panagbusor.” Ket daydi agdindinamag a bumibitla dagiti konserbador inannugutna a sirarag-o ti awis ni Ibarra, ket nagpaipan pay iti tallo a pabo ket inbaunna pay dagiti ubbingna a mapan tumulong.
Isuda amin, pati pay ti alperes, inawatda a sidadayaw ken siraraem ti kura.
—Ngem ¿adinno ti naggapuanyo, Reberensia? —sinaludsod ti alperes idi makitana ti rupa ti kura a napunno kadagiti gargaradgad ken ti abitona a napunno kadagiti nagango a bulbulong ken murmurdong dagiti sangsanga. —?Natnagkayo?
—¡Saan, nayaw-awanak! —insungbat ni Padre Salvi, nga inbabana dagiti matmatana a nangamiris iti aruatenna.
Aglukatda kadagiti botbotelia ti limonada, agpisida iti bunga
ti niog a naganos, tapno dagiti sumang-at a nalpas a nagdigos inda
