—¿Kinabilna ni Padre Damaso?—sinaludsod dagiti dadduma.
Ti koadjutor kas la immisem.
—¡Wen!, ket ita, ni Padre Damaso, masakit! Maatap a iso met la daydi Elias a nangitublak kadakayo iti pilaw, Apo Alperes.
Ti alperes limmabbaga gapo iti bain wenno gapo iti arak a nainumna.
—Kunak la ket din,—intuloy ni Padre Salvi a silalais,—nga ammuyo dayta a banag, kunkunak, a ti alperes ti Guardia Sibil . . .
Daydi soldado kinagatna ti bibigna ket dimmayamudom iti ang-ang a pambar.
Iti daydi, adda nagparang a maysa a babai a nabessag, nakuttong, rutayrutay ti aruatna; awan nakakita iti isusungadna, ta siuulimek ket awan tagtagarina, ket no rabii kuma, inpagarupda a maysa nga araria.
—¡Pakanenyo dayta nakakaasi a babai!—kinuna dagiti babbaket:—!oy!, !umaykay ditoy!
Ngem iso tinuluyna ti nagna ket immasideg iti lamisaan a yan ti kura; toy intaliawna ti rupana, nabigbigna ket naibbatanna ti kutsilio nga igiggamanna.
—¡Pakanenyo daytoy a babai!—inbilin ni Ibarra.
—¡Nasipnget ti rabii ket agpukaw dagiti ububbing!—indayamudom daydi babai.
Ngem idi nasirpatna ti alperes a nakisao kenkuana, daydi babai nakigtot ket nagtaray a nagpukaw iti nagbabaetan dagiti kaykayo.
—¿Asinno dayta? —sinaludsudna.
—¡Maysa a daksanggasat a nagmauyong gapo kadagiti kigkigtot ken tutuok! —insungbat ni don Filipo; —uppat nga aldawna a kastan.
—¿Iso kad dayta ti kunada a Sisa?—sinaludsod a sigagagar ni Ibarra.
—Binalod dagiti sosoldadoyo—intuloy ti teniente mayor, a timekna ti sipapait; insursurda iti ili a gapo iti diak ammo no ania’t naaramid dagiti annakna, a ... di nabalin a nalawlawagan.
—¿Ania?—sinaludsod ti alperes a tinaliawna ti kura:—iso kad dayta ti ina dagiti dua a sakristanyo?
Ti kura intangedna ti ulo na.
