XXVI
ITI BISPERA TI PIESTA
Addatay iti maikasangapulo nga aldao ti Nobiembre, bispera ti piesta.
Ti ili, panawanna ti nakairuamanna a talna; kasta unay ti garaw a ipakitana, garaw nga awan pumada, iti uneg ti balay, iti lansangan, iti simbaan, iti pallutan ken iti away: dagiti tawtawa maikkanda kadagiti parparaypay kada daldalingding a nadumaduma a buya; ti tangatang mapunno kadagiti palpaltog kada tugtugtog; ti angin nga angsen malaukan ket mapunno iti sayamusom dagiti ramrambak.
Nadumaduma a sinsinamit a bungbunga dagiti mulmula sadiay a naikabil kadagiti pagsinsinamitan a sarming a naragsak ti kitada dagiti ur-urnusen ti balasang iti maysa a lamisaan a bassit a naarpawan iti lupot a puraw a naburdaan. Iti paranga-an agkikiak dagiti manmanok, agkakak dagiti up-upa, agraong dagiti babbaboy, a makigtot iti kasdi a ragsak dagiti tattao. Dagiti babaunen umuli, umulugda a nakaiggem kadagiti sumilsilap nga ar-aramaten iti panganan, kubkubiertos a pirak; ditoy, adda riri, ta adda nabuong a pinggan, sadiay, inda katkatawaan ti muttaleng a babai a taga talon: iti amin a diso adda agbilin, agga-arasaasda, aggi-ikkisda, agsasaritada, agipatpatuda, agbibinnilegda iti nakem, ket bin-ig amin a kuso-kuso, ringgor ken arimbangaw ti adda. Ket amin toy a gagar ken amin toy a bannog, gapo laeng iti sangaili nga amammo wenno di am-ammo; gapo laeng iti panangsangaili iti maysa a tao a nalabit di pay nakitkita uray kaano man, ket dinto met ngata agpakitan iti kalpasanna; gapo laeng tapno inna maparag-o ken mabussog ti taga sabali nga ili, ti ganggannaet, ti gayyem, ti kabusor, ti pilipino, ti kastila, ti napanglaw, ti baknang: awan dawaten kadakuada, uray ti la kuma inda panagyaman, wenno ti saan da a panangranggas kadagiti naayat a sangakabbalayan, no daytay madamada wenno malpasda nga agpalpa! Dagiti babaknang, dagiti nakapanen sadi Manila iti naminsan ket ad-ado dagiti inda
nakitkita ngem dagiti dadduma, gimmatangda iti serbesa, tsam-
— 203 —
