a umawat iti uray ania nga aggapo kenkuana? No mabalin
kuma a makan ti relikario!
Ni María Clara kinitana a si-aapal dagidi babbai nga aglaklako kadagiti makmakan ket intal-una ti abagana.
Ngem daydi agkukutel immasideg iti alat, innalana daydi gameng a simmilap kadagiti im-imana, nagparintumeng, inagkanna, sana inikkat ti kallugongna, ket inlumlumna ti mugingna iti tapok a pinayat daydi balasang.
Ni María Clara liningdanna ti rupana iti paypayna ket inpunasna ti paniona kadagiti matmatana.
Iti daydi, adda maysa a babai nga immasideg iti daydi awanan gasat a kas la itay madama nga aglulualo. Siwawakray ket nakusokuso dagiti atitiddag a bubuokna, ket iti lawag dagiti parparol, nakita ti langa a napalalo ti kuttong ni agmauyong a Sisa.
Idi mariknana a sagidenna, daydi agkukutel imkis ket limmagto a timmakder. Ngem daydi agmauyong pinetpetanna dagiti taktakiagna, a kasta unay nga aligagget dagiti tattao, ket kunkunana;
—¡Aglualuta, aglualuta! ¡Ita iso ti aldaw dagiti natnatay! ¡Dagita silsilaw ita isuda dagiti karkararua dagiti tattao; ilualuanta dagidi annakko!
—Isinayo, pagsinaenyo ida! ¡Ma-akaran dayta agmauyong!— ipukpukkaw dagiti tattao, ngem awan met makaitured a umasideg.
—¿Makitam daydiay silaw idiay pagkampanaan? ¡Iso daydiay ni anakko a Basilio a bumaba nga agalus-os iti maysa a tali! ¿Makitam daydiay adda idiay kobento? Iso daydiay ni anakko a Crispín, ngem diak mapan ida kitaen, ta ti kura masakit ket ado ti onsana ket dagiti onsana mapukawda. ¡Aglualuta, ilualuanta ti kararua ti kura! Innak idi inikkan iti paria ken sarsalida; ti minuyungak napunno idi kadagiti sabsabong, ket adda dua nga annakko. ¡Siak idi, adda minuyungak, agmulmulaak kadagiti sabsa- bong, ket adda dua nga annakko!
Sana inibbatan daydi agkukutel ket immadayo nga inna idandaniw:
—¡Siak idi, adda minuyungak ken sabsabongko, addaannak minuyungan ken sabsabong.!
—¿Ania ti nabalinmo nga inaramid iti dayta nakakaasi a babai? —sinaludsod ni María Clara ken Ibarra.
