maikari nga agindeg ditoy. Aduda met dagiti nakitak a prinsipales
a taga Kabite, Pampanga, ado a babaknang a taga Manila ken ado a
banda ti musika, maysa kadakuada ti nalaing unay a banda ti Pagsanhan, kukua ni apo Eskribano, Don Miguel Guevara, ken nakaad-ado a sasanglay kada indio, isuda a siuuray a sikakarayo,
dagiti immuna iti pakaidumdumaánda ket dagiti naudi
iti kinasingpetda, iti aldaw a pannakarambak ti nañgayed a piesta,
tapno inda buyaen ti maiparuar a cómico-mimico-lirico-coreográfico-dramatico, iso a nakairantaan ti nabangon a maysa a dakkel ken
nalawa a pagbuyaan iti tengnga ti plasa.
"Iti maikasiam a uras ti rabii ti aldaw a 10, bíspera ti piesta, kalpasan ti kasta unay nagado ken nagimas a pangrabii nga inggayat kadakami ti Ermano Mayor, dagop mi amin a kakastila ken praile nga adda iti konbento nangngegmi ti tugtog ti dua a banda ti musika a pasaray mapakuyugan kadagiti kukuitis ken palpaltog, kinuyog dagiti sañgareprep a tattao, nga indauluan dagiti prinsipales ti ili, ta umaydakam alaen a mapan itulnog iti disso a naisagana ken naipudi kadakami nga inkam pagbuyaan.
"Naipapilit a pinatganmi toy makaawis a gayat, numan pay kinay kayatko kuma ti naginana kadagiti taktakiag ni Morfeo ken namagtalna kadagiti nasaktan a kamkameng, gapo iti pannakawagwag ti lugan a inted kadakami ti gobernadorsilio ti ili a B.
"Immulugkam, ngarod, ket napanmi dinagas dagiti kakaduami a napan nangrabii iti balayna ditoy ni nasingpet ken nabaknang a Don Santiago de los Santos. Ti kura ti ili, ni M. R. P. Fr. Bernardo Salvi, ken ni M. R. P. Fr. Dámaso Verdolagas, iso nga iti nagpaiduma nga asi ti Kangatuan nga Apo, naimbaganen iti sakit a sinagabana, gapuanan ti maysa a dakes a ima, ni M. R. P. Fr.
Hernando de la Sibyla, ken ti nasingpet a kura ti Tanawan, ken sabsabali pay a kakastila, isuda ti naawis iti balay toy Creso a pilipino. Sadiay naigasatanmi a nagsiddaawan saan la a ti kinabaknang ken ti nasayaat a panagtaripato dagiti akinbalay, banag a saan a sapasap kadagiti taga ditoy, no di pay met ti napateg, nalibnos unay ken nabaknang nga anakna, iso a nangipakita nga iso, maysa a nalaing unay a inadalan ni Santa Cecilia, ta inna tinugtog iti ingget taraki a pianona, a kasta unay naglaing, ta inna man inpalagip kadakam ni Gálvez, dagiti kasasayaatan a tuktukar nga aleman ken italiano. Nakail-ilala toy ingget laingna a balasang, napalalo a nagpakumbaba ket inna man ilemmeng dagiti gung-
