XXX
ITI UNEG TI SIMBAAN
Iti pungto ken pungto napunno daydi kamalig, a ipaay dagiti tattao a balay ti Namarsua kadagiti amin nga adda.
Agdidinnurunda, agdidinnippitda, agpipinnisitda, nga agay-ayay dagiti bassit a rumuar ken dagiti ado a sumbrek. Uray adayo pay unay, adda mañgigaw-aten iti imana tapno mabasa iti danom a bendita dagiti ramramayna, ngem pagammuanen, umay ti dalluyon dagiti tattao ket mayadayo manen ti ima: iso adda mangngeg a uñgor, maysa a babai nga inda napayat, agiri, ngem naituloy ti inda panagdidinnuron. Dagiti sumagmamano a lallakay a makaibabasá kadagiti ramramay da iti daydi danom, a kitana ti pitáken, iso a nagbugwan ti sangkaili, sabali pay dagiti sangsangaili, inda sapsapuan a sipapasnek, nupay kasano a rigat da. ti teltel, ti ulo, ti muging, ti agóng, ti timid, ti barukong ken ti puseg da, iti pammati da nga iti kasdi, mapasanto amin dagidi a kamkameng ti bagi, ket saan nga agsaksakit ti tengngedda, ti uloda, saan da nga agsakit iti sarot, ket saan met nga agsaksakit ti buksit da. Dagiti agtutubo, nalabit gapo ta saan da unay a managsaksakit, wenno gapo ta saan da a mamati iti daydi nasantuan a salaknib kadagiti saksakit, apaman la ta inda basaén ti murdong ti ramay da— tapno awan la ti masao dagiti tattao a mananglualo—ket aginsasagidda met iti muging da a dida met idanon, kas mabalin nga atapen. "Bendita ngata ken amin a kayatda", kuna ngata ti maysa a balasang, "ngem ti kitana...!"
Nakarigrigat ti umanges; napudot ket agadirangot ti angot ti tao; ngem ti agsermon napatpateg ngem amin dagidi a rigrigat: ti sermonna, bayadan ti ili iti dua gasot ket lima pulo a pisos. Ni lakay Tasio kinunana:
—Dua gasot ket lima pulo a pisos iti dayta maysa a sermon! ¡Maymaysa a tao ket maminpinsan! ¡Apagkatlo ti tangdan dagiti
amin nga agkomedia a tallo a rabii da nga agbannog...! !Maipapilit la nga agbaknangkayo!
