a rabii, a nakaaruat iti kawes ti emperador, napintapintaan ket ado
a parparaypay a babassit ti adda iti bukotna, nagiming iti buok
ti kabayo ket nakasapatos iti nangato ti suelasna.
—Awan duadua, kunkunana,— maysa la a kurami ti nadegdeggang nga adayo ngem amin dagiti em-emperador. Idi kuan, dimtenng ti ur-urayen a kanito a panangdengngeg ken Padre Damaso. Dagiti tallo a papadi nagtugawda kadagiti dadakkel a palpalangka a makaawis iti singpet ti namayan da, kas kuna kuma ti nadayaw a pannakabagi ti pagiwarnak a ti Alkalde ken dagiti sabsabali pay a tattao a nakabaras ken nakabaston inda ida tinulad; ti músika nagsardeng.
Daydi bal-layat ti ringgor ken ulimek iso ti nangriing ken Ermana Puté nga adda nga agur-uruken gapo iti músika. Kas ken Segismundo wenno daydi aglutluto a saritaen ni Dornroschen, ti immuna nga aramidna idi nakariing, iso ti inna panangpateltel iti apukona, a kas met kenkuana a nakaturog. Daydi ubing nagiri, ngem iti nabiit nailiwliwagna idi adda nakitana a maysa a babai a dandanugenna ti barukongna a sipapasnek ken sipapati.
Amin dagiti tattao inkalikagumda ti nasayaat a panagyanda; dagiti awan pagtugawanda a bangko, nagmarikadkadda, dagiti babbai nagtugawda iti datar wenno kadagiti saksakada met laeng.
Ni Padre Dámaso linabasanna dagiti ado a tattao, adda dua a sakristan a sinarununa, sa met sinaruno ti maysa a praile a nagig gem iti maysa a kuaderno a dakkel. Nagpukaw idi umul-uli iti agdan a sinanbisukol ngem iti nabiit, nagparang ti nabukel a ulona, sa idi kuan, ti nalukmeg a teltelna a sinaruno a dagos ti bagi na, Sitatalek a nangiwaras kadagiti matmatana, a kas la nagsay-a; nakitana ni Ibarra; maysa a kiray a naipadpaduma ti nangipaawat a saannanto a malipatan kadagiti karkararagna; sana kinita a sirarag-o ni Padre Sibyla, kalpasanna, kinitana met iti nalais ni Padre Manuel Martín, daydi nagsermon idi kalman. Idi nalpas toy a panangamiris, tinaliawna iti saan a nadnadlaw, ti kaduana, ket kinunana: "Kitaem a nalaing, ermano!" Ti kaduana linukatanna ti kuaderno.
Ngem ti sermon maikari iti sabali a paset. Maysa nga agtutubo nga agad-adal idi iti takigrapía ket napalalo nga ayatna kadagiti nalaing a bumibitla, inna inkur-it; yaman pay iti daytoy
mabalintay ita nga ilanad ditoy ti maysa kadagiti ser-sermon kadagidiay a dagdaga.
