nadalos nga addaan ayat; naulimek nga addaan palimed; natured
iti rigat nga addaan anos; maingel nga addaan buteng; naparbeng
nga addaan pakinakem; natured nga awanan kitakit; natulok nga
addaan tudio; managbabain nga addaan dayaw; naannad kadagiti
kukkukuana, ngem managparabor; naalibtak nga addaan kabaelan;
nadayaw nga addaan nalinis a kababalin; nasikap nga addaan laing:
naasi nga addaan ayat; naannad nga addaan bain; managibales nga
addaan ingel; napanglaw gapo iti kinagaget nga addaan annugot;
managparabor a nainot, naalibtak a naliway; nasalimetmet a managayat; kas la ubing nga awanan pay ammo ken mulit, ngem
nasaririt; managbalbaliw a di lumngi; di mangikankano, nga
addaan iti gagar nga agsursuro; ti Dios pinarsuanaka a mangidaniw iti kinadakkel mo ken iti nagan mo a nangatngato ngem
dagiti bitbituen ket nasnaslag ngem ti init nga agpuspusipos iti
babaen dagiti saksakam! !Tulungandak, dakayo, dawatenyo iti
Dios iti manay a paltiing, babaen ti inkay panaglualo iti Abe-Maria!"
Amin dagiti tattao nagparintumengda, ket adda rimmasok a waneswes a kas la aweng ti panagtayab ti rinibo nga alimbubuyog. Ti Alkalde narigatan a nangiparintumeng iti maysa a sakana, ket pinagkutina ti ulona a nakaluksaw; ti alperes, sibebessag ket sibahabawi,
—Alaen kuma ti sairo dayta a kura!— indayamudom ti maysa kadagidi dua a babbaro a naggapo sadi Manila.
—Dika agtagtagari!— insungbat ti maysa, — ania ta mangngegnata ti babai na...
Ni Padre Dámaso di met naglualo iti Abe-María, ngem inna ket inapa ti espíritu santona, gapo ta nabaktawanna ti tallo kadagiti kasayaatan a gunggunglo ti sermonna, nangan iti dua a merengue ket imminom iti sangabaso nga arak a Málaga, ta adda panagtalekna a nalalaing dagidi nga inna pagsapulan iti paltiing ngem dagiti amin a espíritu santo, uray sinan-kalapati a kayo, uray praile a di mangipasnek iti aramidna. Inna rugyan ti sermonna a sao ti tagalog.
Daydi baket a mananglualo pinateltelanna manen ti apukona, iso a nakariing a makapungpungtot ket inna sinaludsod:
—Agsangit kad dataon?
—¡Saan pay, ngem dika matmaturog, nagunggan! —insungbat daydi naimbag nga apo baket.
