kuana ti kura: "sulong!", wenno adayo unayen". Kastoy ti sao
dagiti santo a konsilio ket ti saan nga agtungpal, maeskomulgado."
¿Ket no nuang ti pagsakayan? -sinaludsod ti maysa a managñgata a taga talon, iti kinadennana.
A ket...! saan nga agsardeng a! -insungbat toy, ta kasuista (nalaing iti Teolojía Moral a sirib ti praile).
Ngem, numan pay kasano nga iki-ikkis ken gargaraw ti ag sermon, aduda dagiti nakaturog wenno agaleng-aleng, ta daydi a sermon kankanayon met la nga iso: banbannog la dagiti mananglualo ti nangpadpadas a naginnaasog ken naginsasangit gapo kadagiti basbasol dagiti dakes a tattao, ngem naipapilit a dida intuloy ti panggep da a ta awan met kaduada. Ni pay Ermana Pute sabali la ngad ti panunotnan. Maysa a lalaki a nagtugaw iti abayna nakaturog a nalaing ket natuang a napandaganna nga uray la nagelgel ti abitona: daydi naimbag a baket innalana ti bakiana, rinugyanna a riniing iti bin-ig a pang-or ket inyikkisna:
¡Ay! ¡pumanawka, salbaje, animal, sairo, nuang, aso, nagunggan!
Kasta unay a riri a pinataod ti kasdi, kas kadawyan. Nagsardeng ti agsermon, ingngatuna ti kidayna, a nasdaawan iti kasdi a riri. Ti rurodna linemmesna ti sao iti karabukobna ket isuna la a nagun-udna ti nagungor, ket inna dinanog ti púlpito. Ti kasdi adda binanagna: daydi baket inibbatanna a ngumerngernger ti bakiana, namin-ado a nagugis-ugis, ket nagparintumeng a si-sisingpet.
"¡Aaa! jaaa!" -nakuna idi agangay daydi nakapungtot a praile a pinagdalikepkepna dagiti taktakiagna ket inwingiwingna ti ulona; "iso dayta ti gapona nga inkay kaskasabaan iti kanayon a bigat, salbaje! ¡Ditoy, iti balay ti Dios aggaapa ket agsásaukay iti dakes awanan bain! ¡Aaa! ¡Awan dayawenyon...! ¡Iso daytoy ti gapuanan ti kinagartem ken kinarugit dagiti tawtawen! ¡Kunakon ket!, ¡aaa!"
Ket toy a banag iso intuluyna nga insermon iti bayat ti gudua ti uras. Ti Alkalde agur-urok, ni María Clara maidungdungsa:
daydi nakakakaasi dina magawidan ti turogna, ta awan metten pinta wenno ladawan a inna amisiren ken inna pakalinglingayan. Ni Ibarra dina riknaenen dagiti sasao ken dagiti paspa-
