Daydi lalaki a nakusnig tinungpalna ti saona: saan a dagitay kadawyan a tag-ay (kabria) ti inna inaramid iti ngatuen daydi silulukat a bubon, a pangibaba iti dakkel a bato; saan a dagidi tallo a kaykayo nga agsasanggala nga inbaga ni Nior Juan, a pakaibitinan ti moton, (kararit) nasursurok ngem daydi; saan la a maysa a mákina, maysa pay a pangramen, ngem naindaklan ken nakarangranga a pangramen.
Walo a metro ti kangato daydi narikot a palapala: uppat a dadakkel a kaykayo ti kasna teddek, a tinengngel dagiti dadakkel met nga aw-awanan a nagsasanggala ken nailana kadagiti sabsabali pay a kaykayo, dagiti lanlansa da a dadakkel gudgudua da laeng ti naipalok, nalabit tapno nalakada a masukto, gapo ta di met agtaginayon ti palapala. Dadakkel a taltali nga agbibitin iti amin a bangir ti mangipakita a kas la napigsa ken naindaklan ti pantokna nabalangatan kadagiti parparay pay a nadumaduma a kita ken nakaad-ado a sabsabong ken bulbulong, a nakasaysayaat ti pannakaur-urnos da.
Sadi ngato, iti yan ti linong dagiti kaykayo, bulbulong, sabsabong ken parparaypay, adda naibitin kadagiti taltali ken kawkawit a landok a maysa a nagduma ti kadakkel a kararit a tallo ti ligayna, a kadagiti sumilsilap a ik-ikingda, iso ti nakayusukan dagiti tallo a taltali a dadakkel man ngem dagiti dadduman, ket isuda ti nakaibitinan ti dakkel unay a bato a naabutan ti tengngana, iso a kakalubto ti sabali a bato a kasdi met a naabutan ket adda a naikabilen iti bubon, ket isunto ti pakaidulinan ti pakasaritaan daydi nga aldaw, kas pagpagiwarnak, sinsinurat, pirpirak, medmedalia kdmpy., a isudanto nalabit ti manarita iti daydi a maaramid kadagiti maudi a kapkapututan. Dagitoy a taltali nayuyauyda, naikamangda iti sabali a kararit a saan a basbassit ngem ti immuna, a naireppet iti saka ti tag-ay (kabria), ket naipulipulda iti ligay ti maysa a torno a naikabil iti daga, yaman pay kadagiti dadakkel a kaykayo.
kaykayo. Toy
