Idi ta umad-adanida, daydi bumaro mariknana nga aggutukgutok ti pusona. Dina napupuutan, inna kinita daydi naipadpaduma a palapala a napatakder sadiay; nakitana daydi lalaki a
nakusnig a nanglugay kenkuana a sidadayaw ken nangkita kenkuana iti apagbiit. Nasdaaw ta nakitana met ni Elías, iso
nangkidday kenkuana a pinangipalagipna a dina liplipatan ti
inbagana kenkuana iti uneg ti simbaan.
Ti kura inyusungna dagiti ar-aruaten ti mangannóng ket nairugi ti rambak: ti busá a sakristan mayor igiggamanna ti pagbasaan, ket maysa a sakristan a ubing igiggamanna met ti pagwaris ken ti yan ti danom a bendita. Dagiti dadduma, iti lawlaw, sitatakderda ket inikkatda dagiti kalkallugongda, napalalo ti ulimek, ta nupay nainayad ti inna panagbasa, nadlaw nga agpigerger ti timek ni Padre Salvi.
Naisagana metten a naikabil iti lakasa a sarming dagiti amin a rumbeng a maidulin, kas sinsinurat, pagpagiwarnak, medmedalia, pirpirak, kdmpy., sa daman naikabil aminen iti maysa a nagbukel a buli a nasayaat unay ti pannakarikepna.
—Apo Ibarra, kayatyo a mapan ikabil ti lakasa iti pagyanan na? ¡Ti kura agur-uray! —inyarasás ti Alkalde iti bumaro.
—¡Siaayatak unay, —insungbat toy, —ngem agawekon no kasta dayta nadayaw nga annóng iti apo Eskribano; ni apo Eskribano iso ti rumbeng a mamaneknek iti daytoy nga aramid!
Ti Eskribano innalana a sidedeggang ti lakasa, immulog iti naaplagan nga agdan a mapan iti uneg daydi nakali a bubon, ket inna inkabil daydi bato iti abot, a inaramatna ti mainumo a kinaranga. Iti kasdi, ti kura innalana ti pagwaris ket winarisanna iti danom a bendita dagiti batbato.
Dimteng ti kanito a panangikabil ti tumunggal maysa iti sangkabassit a darat ken apóg iti rabaw daydi bato, nga adda iti uneg ti nakali a bubon, tapno nasayaat ti pannakayakkob ti kaguduana ket agdekketda a nalaing.
Ni Ibarra inyawatna iti Alkalde ti maysa nga idos (kuchara) ti agkabkabiti, a naikitikit iti akaba a bulongna a pirak ti bilang daydi nga aldaw; ngem ni Ekselensia nagbitla pay la nga immuna iti sao ti kastila.
"Agindeg ditoy San Diego"! —kinunana, a timekna ti
sidedeggang: —'Mapadayawankami a mangidaulo iti maysa a ram-
