Pagammuanen, nagdanarudor iti napigsa: ti moton a naigalot iti puon ti tag-ay (kabria), limmagto ket sinaruno ti torno a naipang-or kadagiti kaykayo: nagpallayog dagiti tedteddek, naitayab dagiti namagkakamang, ket amin amin narpuog
iti apagdarikmat a napalalo a nakabutbuteng ti danarudorna.
Rimmasok ti kasta unay a tapok; ti tangatang napunno iti nakakigkigtot a ikkis a nagtitipunan ti rinibo a timek. Nganngani
amin dagiti tattao agtatalaw ket agtatarayda, bassit unay dagiti
nagdardaras a napan iti yan ti bubon. Da laeng María Clara
ken Padre Salvi ti saan a nakagaraw a immalis kadagiti yanda;
sibebessagda ket dida makasao.
Idi nagwaknit bassit ti tapok, nakitada ni Ibarra a sitatakder, iti babaet dagiti aw-awanan, kawkawayan, taltali, iti nagbaetan daydi torno ken daydi dakkel a bato, nga idi ta bimmaba a nakaparpardas, inna winagwag ken rinebba amin a di manganano. Daydi bumaro igiggamanna pay laeng ti idos ket kitkitaenna, a sikikigtot dagiti matmatana, ti bangkay ti maysa a tao, nga adda a naidalit iti sakaananna, a ngangani nagaburan kadagiti kaykayo.
—¿Saan kay a natay? Sibibiagkay pay?— ¡Ipagapuyo iti Dios, agsaukayo! -kunkuna dagiti dadduma nga agan-annóng a sipupunno iti kigtot ken gagar.
—Milagro! ¡milagro! —inpukkaw dagiti dadduma.
—¡Umaykayo, ta umayyo a-unen ti bangkay toy daksanggasat! —kinuna ni Ibarra a kas la karriri-ing.
Idi nangngegna ti timekna, ni María Clara nariknana a pinanawan ti pigsana, ket naituang a kas la naidasay kadagiti taktakiag dagiti gagayyemna.
Kasta unay a kibor: agsasauda amin, pagkutikutienda dagiti imimada, agtatarayda a dida ammo ti pappapananda, umulugda iti bubon, umulida, isuda amin sikikigtot ket sidadanagda.
—¿Asinno dayta natay? Sibibiag pay laeng? —sinaludsod ti alperes.
Nabigbigda ti bangkay a iso daydi lalaki nga adda a sitatakder iti abay ti torno.
¡Mabalod ti maestro de obras! —iso ti immuna a mabalin a
nasao ti Alkalde.
