—Ania ti kayatyo a sawen? —sinaludsudna, ket inna miningmingan a kas la umunton dagiti matmatana daydi di maawa-watan a tao.
—Saan a burburtia dagiti sasaok, ikagumaanko ti nalawag a panangibaga iti kayat ko a sawen. Iti talged yo a nangruna, masapol a dagiti kabusoryo inda pagarupen nga awan ti ammoyo ken. kas la sitatalekkay laeng.
Ni Ibarra simmanod.
—¿Dagiti kabusor ko? ¿Adda aya kabusor ko?
—¡Datay amin addaantayo, apo, manipod iti kabassitan a igges agingga iti tao, manipod iti kapanglawan agingga iti kabaknangan ken mannakabalin unay! ¡Ti panagbubusor iso ti linteg ti biag!
Ni Ibarra kinitana a siulimek ni Elías. —¡Saan kay a mangyurit (piloto), saan kay met a taga taltalon!...— kinunana.
—Addada kabusoryo kadagiti nangato ken nababa a tao,— intuloy ni Elías a dina ket inbibiang dagiti sasao daydi bumaro; —sigpenyo ti mangaramid iti maysa a dakkel a banag, adda nalabesyo, daydi dakkelyo, daydi apoyo a lakay adda met kabusorda, a ta naaddaanda met iti rikna, ket ditoy a biag, saan a dagiti dakes a tattao ti adadda a magurgura no di ket dagiti natakneng.
—Am-ammuyo dagiti kabusor ko?
Ni Elías saan a simmungbat a dagus ket nagpanunot.
—Naam-ammok ti maysa, daytay natay, —insungbatna.— Idi rabii nadagtaak nga adda panggepna nga aramiden a dakes kadakayo, gapo kadagiti sumagmamano a sasaona iti maysa diak amammo, iso a nagpukaw a nakilaok kadagiti ado a tattao. "Ni daytoy saanto a sida dagiti ik-ikan a kas ti daydi amana, makitayunto no bigat."—kinunana. Dagitoy a sasao inawisda ti imatang ko saan la a gapo iti kayulugan da, no di ket gapo iti daydi tao a nagkuna, a iso a sumagmamano la nga al-aldaw nagparang iti maestro de obras, nga awan sabali a kinayatna no di ti inna panangiturong iti pannakaikabil ti umuna a bato, saan nga ado ti tangdan a dinawatna, ket kasta unay a inna panangipaspasindayaw iti kaado ti ammona. Siak awan umanay a
panggapuak a mangatap iti kinadakes ti panggepna, ngem iti
