Ti alperes napilit a nagkatawa a pinanglingedna kadagidi a
sasao ni Padre Salví ket kas la saanna a narikna.
—Ngem, appo, saan ko a maawatan no ania ti gapona a dagiti panagab-abak kada pannaka-ab-abak pay met ket di ti inna masarsarita. —insamang ti Alkalde; —¿anianto ti kuna kadatayo dagita naayat ken manakem a babbabalasang a mangpadayaw kadatayo iti kaaddada? Kaniak, dagiti babbalasang kas da kadagitay arpa eólika nga umaweng iti kaltaang ti rabii; masapol a inna ida imdengan ken timuden, tapno ti di maibuksilan a kinasam-it dagiti aw-awengda a mangitayag iti kararua kadagiti nailangitan a yuyyuyeng ti awan inggana ken kankanayon a essem...
¡Agdaniw ni Ekselensia!— kinuna a siraragsak ti Eskribano, ket isuda a dua intangadda dagiti tagtagayan da.
—Diak mabalin ti di agdaniw, —kinuna ti Alkalde ket pinunasanna dagiti bibbibigna; —ti kanito, no saan a kanayon a paburirawanna ti agtaktakaw, pataudenna ti agdandaniw. Idi agkabanuagak, nagputarak iti daniw a pudno met ket di a saan da a dakes.
—¡No kasta, Ekselensia, linikudam dagiti Musa gapo iti isusurotyo ken Themis! —kinuna nga inkaros ti pannakabagi ti pagiwarnak, a mannakaammo iti maipapan kadagiti mito ken mitolojia.
—¡Psch! ¿ania ti kayat yo? Ti panangunor kadagiti amin a pangpangal ti biag iso ti kankanayon a tinagtagainepko. Idi kalman, nagpurpurusak kadagiti sabsabong ket nagdandaniwak, ita, igiggamak ti baras ti Linteg ket ipapaayko ti bagik kadagiti tattao, inton bigat....
—Inton bigat Ekselensia ipuruakyunto ti baras iti apoy tapno adda inkay paginuduan inton umapay ti lamiis ti kinalakay ket mangalakayto iti maysa a kartera ti Ministro, —innayon ni Padre Sibyla.
¡Phs! wen,... saan... ti agministro saan a iso ti nangruna a tartarigagayak: uray asinno a kassalog mabalinna ti agministro. Maysa a talon sadi Amianan, a mapan pagpalpalamiisan no
dumanon dagiti napudot nga al-aldaw, maysa a balay sadi Madrid ken sabali pay a balay sadi Andalucía a pagyanan, no nalamek... Agbiagto datao a manglaglagip iti ay-ayaten a Pilipi-
