—¡Kura! ¡prr! ¿kura? Ti doktor ado ti mapirakna; dagiti adda sakit da inda pagraeman, kumare!
—¡Ipaayyo man nga ayat! Ti kura, no makapagpuligos iti mamitlo wenno maminpat ket "deminos pabiskum" makunana, makanna ni Apo Dios. umawat man iti piraken. ¡Amin a tattao. pati pay dagiti babbai, inda ibaga kenkuana dagiti palpalimedda!
—¿Ket, ti doktor? Ania aya ti pangipagarupan yo iti doktor? Ti doktor makitana amin nga adda kadakayo a babbai, ipulsuanna dagiti babbalasang... ¡No siak, kayatko kuma ti agdoktor iti uray maymaysa laeng a lawasna!
—Ket, ti kura? ¿apay, ti kura dina aya makita ti makita ti doktor yo? ¡Ket nalalaing pay a! ammuyo tay pagsasaon: "¡manok a nalungpo ken nabukel a luppo, kukua ti kura, apo!"
—¿Ket, ania? ¿agsidsida kad dagiti dodoktor iti tuyó? ¿madanar kad ti ramay da nga agsida iti asin?
—¿Marugitan aya ti ima ti kura a kas kadagiti dodoktoryo? ¡Iso ti gapona a ti kura adda asyendada a dagdaga a nalawa, ket no agbannog, mamusikuan ket tulungan pay dagiti sakristan!
—¿Ket ti panangonpesar, kumare? ¿Saan nga aramid?
—¡Ania met nga aramid! ¡Dakayo kayatyo kuma no kunpesarenyo amin ti lubong! ¡Mabannog ket aglingettay kadi a mangunton no ania ti ar-aramiden dagiti lallaki kada babaai, no ania ti kukuen dagiti karkarruba tayo! ¡Ti kura awan sabali nga aramidna no di agtugaw, ket dagiti tattao inda saritaen. amin kenkuana; no dadduma, maturog, ngem mamendision iti mamindua wenno mamitlo, ket iso, annaknatay manen ti Dios! ¡Kayatko man kuma ti agkura iti maysa a malem ti kuaresma!
—Ket ti...ti agsermon? dayta ket di, saan yo a mabalin a kuna a saan nga aramid. ¡Kitaenyo no saan, no kasano ti panaglingetna itay bigat ti kura dakkel! —kinuna daydi lalaki a nganngani maabaken.
—¿Ti agsermon? ¿Aramid kad met ti agsermon? ¿Adinno ti yan ti nakem yo? ¡Kayatko man kuma ti agsaosao iti gudua ti aldaw, manipod iti púlpito, a mangung-unget ken mangap-apa
kadagiti amin a tattao, nga awan makaitured a sumungbat, sadak pay bayadan! ¡Kayatko man kuma ti agkura iti maysa la
