—!A! !ania kad ti kayat yo nga innak ibaga! Dakay
a dua,
pudno dagiti sasao yo; ti kura adda kalinteganna, ngem ti Dios
addaan met ngata! Diak ammo, maysaak la nga ang-ang... !Ti
aramidek ita, ibagak itay anakko a saan nga agad-adalen! !kunada
a dagiti mamasirib matayda a mabitay! Maria Santisima! tay
anakko a kayatna ti mapan sadi Europa!
—Ania ti panggepyo nga aramiden?
—Ibagak kenkuana nga agbati iti dennakon, ĉania pay la ti pambaranna nga agad-adal? Inton bigat, wenno inton kasangabigat, matayto datao, matay ti masirib, matay ti awan ammo na... ti naimbag, agbiag datao a sitatalna.
Ket daydi naimbag a babai umasog ket inna itangad dagiti matmatana sadi Langit.
—No siak,―kinuna a sidedeggang ni kapitana María,—no baknangak la kuma a kas kadakayo, baybay-ak dagiti annakko nga agbaniaga; bumbumaroda ket dumtengto ti aldaw a panagbalin da a nataengan a tattao... siak, bassit ti panagbiagkon... agkikitakamto iti sabali a biag... dagiti annak rebbengda nga ikagumaan nga agbalinda a nalalaing ngem dagiti nagan-annak kadakuada ket iti saklot tayo, awan sabali a maisurutayo no saan a ti inda panagtaginayon nga agub-ubing.
—¡Ay! ¡ania ket a nagsabali dagiti panpanunot yon! —kinuna a nakigtot ni kapitana Tinay, a pinagakubna dagiti im-imana; —Ikas man la di kay nagrigat a nangipasngay kadagiti annak yo a singin!
—Gapo ngarod ket ta nagrigatak a nangipasngay kadakuada, pinatan-ay ket sinursuruan ida, nupay marigrigat kami, diak kayat a, kalpasan ti kasta unay a rigat ken bannog a innak linaklak-am gapo kadakuada, agbalinda a sinantatao...
—Kunak a saan yo nga ayaten dagiti annak yo a kas bilin ti Dios! kinuna ni ermana Rufa, a timekna ti naiget.
—Pammakawananyo, tunggal iná adda bukodna a panagayat kadagiti annakna: addada inná a managayat kadagiti annakda tapno inda ida paglak-aman; addada mangayat kadagiti annak da gapo kadakuada met la a naganak; ket addada managayat kadagiti annak da gapo iti pagimbagan met la dagiti annak da. Siak, maysaak kadagitoy naudi, kasta ti insuro kaniak daydi nagawan
nga asawak.
