—¡Amin dagiti panpanunotyo, kapitana María,-kinuna ni
Rufa a kas la agsermon, saan da a mayalubog iti Relijión: sumrekkay a ermana wenno kabsat ti Santísimo Rosario, ni San Francisco, ni Santa Rita, wenno ni Santa Clara!
—¡Ermana Rufa, inton maikari-akon a kabsat dagiti tattao, saakto panunuten ti makikabsat kadagiti sasanto!-insungbatna nga immisem
Tapno maringpastay daytoy a paset dagiti masarsarita, ket tapno dagiti agbasbasa makitada met uray apagbassit laeng ti sasawen dagiti taga taltalon maipanggep iti daydi a naaramid, intay iti plasa, iso a yan a pagsasaritaan, iti linong ti sapaw, dagiti sumagmamano a taga taltalon, maysa kadakuada am-ammutayon, ta iso daydi lalaki a mangtagtagainep kadagiti dodoktor a mangngagas.
—¡Ti kaleddáang ko unay, -kunkuna toy, -iso ti saan a pannakatuluyen ti pagadalan!
—Apay? tapay? —saludsuden a sigagagar dagiti adda iti lawlawna.
—Ti anakko saanto nga agdoktoren, no di ket agpagpaguyod iti karison! !Awan! Awan pagadalanen!
—Asinno ti agkuna nga awanto ti pagadalanen? —sinaludsod ti maysa a nagubal ken nabaneg a taga talon, akakaba dagiti pangpangalna ket bassit ti ulona.
—¡Siak! Dagiti papadi a pupuraw ninaganda ni don Crisóstomo iti "plibastiero." ¡Awan pagadalanen!
Amin dagiti sisasango napamayengda, a matada ti kas la umun-unton. Daydi nagan, baro kadakuada.
—¿Ket, dakes aya dayta a nagan? —nakuna idi agangay daydi nabaneg a taga talon.
—¡Iso ti kadaksan a mabalin a sawen ti maysa a kristiano iti padana a kristiano!
—¿Dakdakes ngem tarantado ken saragate?
—¡No kuman daydayta laeng! Namin-ado a pinanpanaganandak iti kasta ket diak naan-ano, uray kuma la no nagsakit ti buksit ko.
—¡Ala!, saan ngata a dakdakes ngem ti "indio" a kuna ti alperes!
Daydi akin-anak iti daydi agbalinen nga agpagpaguyod iti karison, adadda manen a malmalday; daydi maysa kudkudenna ti
ulona ket agpanunot.
