Iti balay ni Kapitan Tiago saan a basbassit ti kibor ngem iti ulo dagiti tattao. Ni María Clara awan sabali nga aramidna no di agsangit ket dina denggen dagiti pangliwliwa ni ikitna ken ni Andeng, daydi kinaskasusona. Inparit ni amana a makisao ken Ibarra inggana iti saan a ikkaten dagiti papadi ti pannaka- eskumulgadona.
Ni Kapitan Tiago, a kasta unay pannakaparinggorna a mangisagsagana iti balayna tapno maikari a dagusan ti kapitan general, pinaayabanda iti konbento.
—Saan ka nga agsangsangit, anakko, —kunkuna ni ikit Isabel, a punpunasanna iti gamusa dagiti nasilap a sarsarming; ikkatendanto ti pannakaeskumulgadona, suratandanto ti Santo Papa. mangtedtayto iti dakkel a limos... ¡Ni Padre Dámaso nadasay laeng . . . saan a natay!
—Saan ka nga agsangsangit, —kunkuna met ni Andeng iti ainayad a timek; —aramidekto a makasaom: ania ti gapona a naaramid dagiti konpesonario, no di gapo tapno intay agbaso!? Mapakawan amin no ibaga iti Kura!
—Idi kuan, simmangpeten ni Kapitan Tiago. Dagiti babbai sinapulda iti rupana ti sungbat dagiti ado a salsaludsod; ngem ti rupa ni Kapitan Tiago ipakitana a mapulkukan unay. Daydi nakakaasi a tao aglinget, ipunasna ti imana iti mugingna, ngem awan, saan a makapagsao uray maysa laeng.
¿Ania, Santiago? -saludsuden a sigagagar ni ikit Isabel. Ni Kapitan Tiago asog ti inna insungbat, ket punasenna ti luana.
—¡Ipagapom ken Apo Dios, agsauka! Ania ti maaramid?
—¡Naaramid ti ibutbutengkon! —nakunana idi agangay,
a makasangsangit. —¡Napukaw aminen! ¡Ni Padre Dámaso ibilinna a gupdek ti nalpas a nagtutulaganen, tano saan, madusaák
