—!Kayatko a kasao dayta a bumaro! —kinuna ni Ekselensia iti maysa nga ayudante na; —riniingna amin a gagarko.
—¡Napanda sinapulen, Jeneral! Ngem adda maysa a bumaro a taga Manila a dumawdawat a sigaganetget iti pannakisaritana kadakayo. Inbagani kenkuana nga awan kanitoyo ket saan kay a inumay ditoy a umay agdengngeg iti asog, no di umay kumita iti ili ken agbuya ti libot, ngem insungbatna a dakayo adda laeng kanitoyo a mangipaay iti linteg.
Ni Ekselensia tinaliawna ti Alkalde a sisisiddaaw.
—No diak maallilaw, kinuna toy a nagkurno bassit,— iso dayta tay bumaro a nakiringgor itay bigat ken Padre Dámaso gapo iti sermon.
¿—Sabali manen? —Inranta dayta a praile ti mangriribok iti probinsia, wenno ipagarupna nga iso ti agbilin ditoy? ¡Ibagayo iti dayta bumaro a sumbrek!
Ni Ekselensia agpagnapagna a makapungpungtot iti murdong ken murdong ti kadaklan.
Iti siled a kasaruno ti salas aduda dagiti kakastila, a nailalaok kadagiti tuturayen dagiti sosoldado, agturturay iti ili a San Diego ken sabsabali pay a umili; napurukpurukda ket agsasarita wenno aggaángatda iti sao. Addada met sadiay amin dagiti praile, malaksid ni Padre Dámaso, ket kayatda met ti sumbrek a mangiruknoy iti panagdayawda ken Ekselensia.
—¡Ni Ekselensia, ti Kapitan Jeneral, dawatenna kadakayo, Reberensias, nga aguraykay bassit,— kinuna ti ayudante; —sumbrekkayo, bumaro!
Daydi taga Manila, a namagsinnukat iti saó ti griego ken sao ti tagalog, simbrek iti salas a sibebessag ken sipipigerger.
Isuda amin nasdaawanda unay: maka-unget ngata unay ni Ekselensia, ta maituredna man a pagurayen dagiti praile. Ni
Padre Sibyla kinunana:
