—Agtugawkayo, Reberensias! —sana innayon kalpasan ti
nabiit a bannayat a pinasam-itna bassit ti timekna.
Ni Kapitan Tiago nakaaruat iti prak ket agtiltil-ay a magmagna; kinibinna ni María Clara a simbrek a si-a-alumiim ken sibubuteng. Nupay kasta, nagtamed iti nataraki ken nadayaw unay.
—lso ti balasang nga anak yo? —sinaludsod a nasdaaw ti Kapitan Jeneral.
—Ken anak yo met, Jeneral!—insungbat ni Kapitan Tiago, a siraranga.
Ti Alkalde ken dagiti ayudante nagmulagatda, ngem ti Kapitan Jeneral, a dina ket binay-an ti kinadeggangna, inggayatna ti imana iti balasang, ket kinunana a sia-ayat:
¡Nagasat dagiti nagannak nga addaan anak a kas kadakayo, balasang ko! naraem ken nadayaw ti nanarsaritaan da kaniak iti biangyo . . . kinalikagumankayo a makita ta kayatko nga isawang ti innak panagyaman gapo iti naimbag a inkay inaramid ita nga aldaw. Naammuak amin, ket inton agsuratak iti nangato a Turay ti Ari, diakto lipatan ti naimbag a inaramidyo. Ngem ita, ipalubusyo nga, iti nagan ti Nangato nga Ari, a ditoy, siak ti pannakabagina, iso a mangayat iti talna ken talingengen dagiti natudio nga iturayanna, ken iti pay met nagan ko, iti nagan ti maysa nga ama nga addaan met iti annak a babbalasang a katawtawenyo, ipalubusyo, kunak, a itdek kadakayo ti napusuan a panagyaman ken ti innak panangikalikagom a maikkankay iti maysa a gungguna!
¡Apo . . . ! —insungbat a sipipigerger ni María Clara.
Ni Ekselensia naawatanna ti kinayatna nga insao, ket kinunana:
—Naimbag unay, balasangko, a dakayo inkay mapneken ita uneg ta pusoyo ken iti ayat dagiti kakailianyo: pudno nga iso ti kasayaatan a gungguna, ket saan kuma a datao ti sumapo! iti sabalin. Ngem didak kuma paidaman iti maysa a nasayaat a waya nga innak panangipakita a no ti Linteg ammuna ti manusa, ammuna met ti manggungguna, ket saan a kanayon a sibubulsek.
Dagiti sasao a naideppel iti nagirig a letra nabalikasda a
kas la adda sabali a kayatda a sawen ket napigpigsa pay ti pannakaisawangda ngem dagiti dadduma.
