¡Ni Don Juan Crisóstomo Ibarra aguray iti bilin ni Ekselensial —kinuna iti napigsa a timek ti maysa nga ayudante.
Ni María Clara nagkintayeg.
—¡A! —kinuna ti Kapitan Jeneral, ipalubusyo, balasangko, nga innak isawang ti tarigagayko a makasubli a makakita kadakayo kasangwanan ti ipapanawko ditoy a ili: adda pay la nasken unay a banag a innak kadakay isarita. ¡Apo Alkalde! kuyugendakto kuma nga mapan manglibot iti ili a kayatko nga aramiden a magmagna, kalpasan ti innak pannakisarita a maymaysa ken apo Ibarra!
—Ni Ekselensia ipalubusna kuma nga inkam ibaga,—kinuna ni Padre Salvi a sipapakumbaba, —a ni apo Ibarra, naesku mulgado.
Ni Ekselensia ginupedna ti saona ket kinunana:
—Maragsakannak unay, ta awan sabali a leddaangek no di laeng ti agdama a sakit ni Padre Dámaso, a ti maminpinsan a ipipiana iso ti nalawag a kalikagomko, ta iti tawenna, saan ngata unay a nasayaat ti ipapan na sadi Espania a gapo iti salunatna. ¡Ngem itoy iso ti makaammo . . . ket ita, ni Apo Dios ti mangtaginayon iti piayo, Reberensias!
Maysa ken maysa kadakuada, pimmanawda.
—¡Ket, iso pay ti makaammo a! —indayamudom ni Padre Salvi idi rimuar.
—¡Kitaento no siasinno ti umun-una nga agbaniaga! —innayon ti sabali a pransiskano.
¡Agawidak itan! —kinuna a siluluksaw ni Padre Sibyla. —¡Ket dakami agawidkam met idiay probinsia min!— kinuna dagidi agustino.
Maysa ken maysa kadakuada dida maibturan a gapo iti biddot ti maysa a pransiskano, ni Ekselensia inna ida inawat a silalamiis.
Iti siled a kasaruno ti salas nakisinnabatda ken Ibarra, daydi nangsangsangaili kadakuada iti nabiit pay a uras. Saan da a nagkikinnablaaw, ngem nagkikinnitada iti ado ti kayatna a sawen.
Saan a kasta ti Alkalde, ta idi ta makatalawen dagiti praile, inna kinablaawan ket inggayatna ti imana iti nainggagayyeman unay, ngem ti idadateng ti ayudante a napan nangsapol iti bumaro saanna nga inpalubos a inda nakapagsarita.
