Iti ruangan nagsabatda ken María Clara: dagiti matmatada a dua ado ti nagsinnawanda, ngem naipadpadumada unay iti sinao dagiti matmata dagiti praile.
Ni Ibarra nakapanes iti naiget. Dimmatag a sitataina ket nagtamed iti nauneg, nupay ti ipapan dagiti praile inparagupna a saan a nasayaat a pakdaar.
Ti Kapitan Jeneral immaddang a simmabat kenkuana. Maayatannak unay, apo Ibarra, a pumetpet iti imayo. Ipalubusyo nga awatenkayo iti sidong ti panagtalek. Pudno, ni Ekselensia kitkitaen ken am-amirisenna daydi bumaro a saan a mailemmeng ti ayatna.
—¡Apo, dayta nga imbag...!
—Masaktanna iti dayta siddaawyo, kayatna sawen a saan yo nga inuray a nasayaat ti panangawat ko kadakayo: ti kasta kayuluganna nga agduadua kayo iti kinalinteg ko!
Ti naayat a pannakaawat, apo, a maipaay iti maysa a kabassitan a buyot ti Ari, a kas kaniak, saan a linteg, maysa a kaasi.
—¡Ala wen, ala wen! —kinuna ni Ekselensia a nagtugaw ket intuduna met ken Ibarra ti maysa a tugaw, —bay-andakam met nga aglak-am iti sangkabassit a ragsak; maayatannak unay iti aramidyo ket inkalikagumkon iti Turay ti Ari a maikkankay iti maysa a gungguna gapo iti naimbag unay a gakatyo a mangibangon iti maysa a Pagadalan . . . No kuma no immaykay kaniak, immayak kuma timmabuno a siraragsak iti rambak ket nalabit a naliklikan kuma ti maysa nga inkay nagluksawan.
—Gapo ta bassit unay ti napanunotko a bangunen, insungbat daydi bumaro, —inpagarupko ket di a saan a maikari a panangsinga iti imatangyo kadagiti ado unay nga ar-aramidyo; maysa pay, ti rebbengko iso ti innak panangipakaammo nga u muna iti kangatuan nga agturay iti probinsiak.
Ni Ekselensia pinaggarawna ti ulona a kas la makaay-ayat unay, sana intuloy nga inyadadda pay ti nakaim-imo a timekna:
—No maipanggep iti naaramid kadakay ken Padre Dámaso, saan kay nga agbuteng ken gumura; awanto ti masagid a uray maysa a buok ti uloyo, no siak pay met la ket ti agturay kadagitoy a Purpuro; ket no maipapan iti eskomunion, innakto kasao ti arsobispo, ta masapol a sumuruttayo kadagiti agdama a
