ni sipnget. Iniggamanda ti dua nga akakaba a sintas a balbag
a naisingdan iti karro ni Apo Santa Maria, ket inda man ipalagip dagiti kalkalapati a mangguyguyod iti lugan ti Primabera.
Amin dagiti ladladawan addadan a si-aallingag, nagdedekkctda a dumngeg iti daniw; amin dagiti tattao sikikitada iti apagbingngi a dalingding; idi kuan, maysa nga ¡aaa! ni siddaaw ti nagruar kadagiti bibbibig.
Ket pudno a kaikarianna: maysa a bumbumaro a nagpayak, nagbotas iti botas ti agkabayo, nagbanda, nagbarikes ket nagkallugong iti adda lawina.
—¡Ti apo Alkalde Mayor!—inpukkaw ti maysa, ngem daydi pagsiddaawan a parsua rinugyanna nga inbitla ti maysa a daniw a nakaskasdaaw a kas met la kenkuana, ket saanna nga inbibiang ti inda panangipadis kenkuana.
¿Ania pay la ti pangyallatiwan ditoy iti sao ti latin, tagalog ken kastila, a naidaniw amin, a inbitla daydi nakakaasi nga insubo ti gobernadorsilio? Dagiti agbasbasa nananamdan ti ser mon ni Padre Damaso iti bigat, ket dimi kayat ida a painaman iti kasta unay a nakaskasdaaw, maysa pay, mabalin a ti pransiskano dumakes ti pusona kadakami no inkam isapulan iti kasalisalna, ket toy iso ti saan mi a kayat, ta tao kam a natalna, ta kasta ti gasat mi.
Iti kalpasanna, naituloy ti libot: ni San Juan intuluyna ti napait a dalanna.
Idi lumabas ni Apo Santa Maria iti sango ti balay ni Kapitan Tiago, maysa a timek a nailangitan ti nangidaton kenkuana iti daydi kabla-aw ti arkanjel. Maysa a timek a nasantak, nasam-it, gumawgawwawa ti nangisangit iti Abe-Maria, ni Gounod, a dinanggayan ti piano a nakipaglualo met kenkuana. Ti musika ti libot nagulimek, ti lualo simmardeng ket ni pay Padre Salvi nagmayeng. Daydi a timek mamigerger ket gutugutenna piman a lumbuak ti lua: saan la a kablaaw, saan la a kararag, saan la nga asog ti inna isawang.
Ni Ibarra nangngegna daydi timek manipod iti tawa a yanna, ket da aligagget ken liday kinebbuyutanda ti pusona. Naawatanna ti tuok a sagabaen daydi a kararua nga inna man isa wang iti maysa a daniw, ket nagbuteng a nangsaludsod no ania
ti puon daydi a pagel.
