—!Isunan, saanka nga agkantan!—kinuna ti alperesa iti nasayaat a sao ti tagalog, ket timmakder a di makaidna;—!dika agkankantan! Idangrandak dagita a dandaniw!
Daydi agmauyong nagulimek; ti asistente naibbatanna toy a sao:—“!Ni! lammuna met gayam ti sao ti tagalog!”, ket miningminganna a sipupunno iti siddaaw ti siniura.
Toy naawatanna nga iso met la ti nangisuplong iti bagina; nabainan, ket gapo ta saan a kababalin ti babai ti kababalinna, ti bainna nagbalin a pungtot ken apas. Intuduna ti ruangan iti daydi awanan annad, sana rinipkan a inkugtar idi nakaruar. Naglawlaw iti siled a inna pinikunpikon ti pagbaot kadagiti mangur-urat a im-imana, sa nagkellaat a nagsardeng iti sango daydi agmauyong ket kinunana kenkuana iti sao ti kastila:
—!Agsalaka!
Ni Sisa saan a nagkuti
—!Agsalaka, agsalaka!—inulitna, a timekna ti nakabutbuteng.
Daydi agmauyong kinitana kadagiti mang-malmalanga a matmatana, nga awan maisauda: ti alperesa inngatuna ti maysa ngr ima ni Sisa, sa man ti maysan, a daytay inna winagwag; awan. ni Sisa dina piman ma-awatan.
Naglagtulagto, winagwagna ti bagina, a panggargarina iti agmauyong tapno inna tuladen. Iti adayo, mangngeg ti musika ti libot nga agtugtugtog iti maysa a marcha a nadeggang ken nangayed, ngem ti siniura aglagtulagto a sipupungtot, a sabali nga ayog ti sursurutenna, sabali a musika ti mangngegna iti unegna. Ni Sisa kitkitaenna a di aggaraw; maysa a kas la gagar nga agbuya ti naibagas kadagiti matmatana ket maysa a nakapoy a isem ti namagkuti kadagiti nabessag a bibbibigna: nakaayat iti sala ti siniura.
Nagsardeng toy a kas la nabainan, inlayatna ti pagbaot, ti nakabutbuteng a pagbaot nga am-ammo dagiti birbirkog ken sosoldado, a naaramid sadi Ulango ket ninayunan ti alperes iti barot a naiputipot, ket kinunana kenkuana:
—Ita, sika met ti agsala... !agsalaka!
Ket rinugyanna a binaot iti nainayad dagiti silalamulamo a
saksaka ti agmauyong, a ti rupana nagmusi-ig iti sakit, ket napilit a insarapana dagiti im-imana.
