—!Yaman pay! umanayakon a maymaysa nga agdardarepdep
ken agmamauyong,—insungbat daydi pilosopo a nagkatawa iti
nalais;—ngem, ita malagipko, Psaanyo a dillawcn ti kababalin ti
ili tayo? Idinto ta natalna, kaay-ayuna a buyaen dagiti gubgubat,
dagiti dangdangadang a pagpusuakan ti dara; idinto ta mamati iti
panagpapada dagiti amin a tattao, pagrukbabanna dagiti em-emperador, ar-ari kada pi-prinsipe; idinto ta di unay mamatpati iti Rclijion, busbusenna amin a kukuana kadagiti ramrambak ti simbaan; idinto ta dagiti babbai ditoy nasam-it unay ti kababalinda,
aggunnuyda no adda prinsesa a mangiwaradiwad iti duros.. .
Pammuyo no ania ti gapo ti kasta? Ngamin...
Ti idadateng ni Maria Clara ken dagiti gagayyemna iso ti nangguped iti saritada. Inawat ida ni don Filipino ket kinuyugna ida nga intulnog kadagiti tugtugaw da. Iti likudanda, simmaruno ti kura ken maysa pay a pransiskano ken sumagmamano a kakastila. Addada met simmurot iti kura a sabsabali a tattao nga awan sabali nga aramidda no di la ti mangkuyog kadagiti praile.
—Ni Apo Mugna ti manggunguna met kadakuada iti sabali a biag!—kinuna ni lakay Tasio ket immadayo.
Ti naipabuya inrugi da Chananay ken Marianito iti "Crispino e la Comare." Amin dagiti tattao addada a sikikita ken si-aallingag iti pagbuyaan, malaksid laeng ti maysa: ni Padre Salvi. Kas la awan sabali a panggepna a napan sadiay no di mangbantay ken Maria Clara, a ti lidayna inikkanna man ti libnosna iti lingay a nakasaysayaat ken nakaay-ayo unay a buybuyaen, a maawatan piman ti gapona a ti kumita kenkuana inna mapamayeng iti rag-o. Ngem dagiti matmata daydi pransiskano a nakaun-uneg ti pannakailemmengda kadagiti adalem nga ab-abotda, saanda a mapamayeng iti rag-o: iti daydi nasipnget a ikikita adda mabasa a ladingit nga awanan inanama: Ikasdi ngata ti ikikita ni Cain manipod iti adayo iti Paraiso a dagiti namnam-ayna nga inna sinarsarita kenkuana ni inana!
Agturturpusen daydi a paset ti maipabuya idi dimteng ni Ibarra; ti kaaddana pinarnuayna ti maysa nga anaba-ab: iti imatang dagiti amin a tattao, naiturong kenkuana ken iti kura.
Ngem daydi bumaro kas la saanna a nadlaw, ta kinabla-awanna iti kas kadawyan ni Maria Clara ken dagiti gagayyemna,
