balay ni Kapitan Tiago. Sadiay, immanges: nakitana iti arinaga
ti dalingding ti maysa nga anniniwan, ti pagrukbaban nga anniniwan, ti sipupunno iti sayaksak ken nalanay nga anniniwan ni
Maria Clara, ken ni ikit Isabel a nagiggem iti tagayan.
—!Ala!—indayamudumna, —Inagsakit sa laeng!
Ni ikit Isabel rinipkanna dagiti tawtawa, ket daydi nakaayayo nga anniniwan saan a nagpakitan.
Ti kura immadayo iti daydi a disso a dina ket makita dagiti ado a tattao. Iti sango dagiti matmatana adda a kitkitaenna ti nalibnos a rupa ti maysa a balasang, a matmaturog ket umanganges a sisasam-it; dagiti kalkalob dagiti matmatana a sinalinungan ida dagiti atitiddag a kurkurimatmat a nakasigsigar laeng, a kas kadagiti Santa Maria nga inpinta ni Rafael; ti bassit a ngiwatna umis-iscm; amin daydi a rupa ipakitana ti kinadalos, kinatarnaw ken kinasilnog; daydi a rupa, maysa a nasam-it a parparmata iti yuycng dagiti puraw nga ar-aruaten ti iddana, kas la maysa nga ulo ti kerubin a tumaod iti baet dagiti ul-ulep.
Ado pay dagiti sabsabali a banbanag a nakitkita ti isip na. . . ?ngem, siasinno ti makabalin a mangisurat iti amin a makita ti maysa a bumarbara nga utek?
Nalabit ti pannakabagi ti pagiwarnak, iso a kastoy ti inna pinangileppas iti sinuratanna a pakasaritaan ti rambak ken amin dagiti naar-aramid:
“Mamenribo a pagyamanan, di mabubos a pagyamanan ti napardas ken naitumpong unay a ibabaet ni M.R.P., Ft. Bernardo Salvi, iso, a sinarangetna amin a peggad, iti laem daydi ili a sipupungtot, iti let-ang daydi gunglo dagiti tattao nga awan makabalin a makatengngel kadakuadan, awan kallugongna, awan bastonna, inna inep-ep ti pungtot dagiti tattao, nga awan ket sabali nga inaramatna no di laeng ti makaawis a panagsaona, ti kinadeggang ken ti turay a saan nga agkurang iti Ministro ti maysa a Relijion ti Kappia. Toy nasingpet a padi, a di ket makasarak datao iti pangipada-an iti ayatna, binaybay-anna ti imas ti turog, nga amin a naimbag a kararua a kas kenkuana inna paglak-aman, tapna mailisi dagiti adda iti aywanna iti uray sangkabassit la a bareng-ania. Dagiti umili sadi San Diego, awan duadua, didanto malipatan toy nagpaiduma iti imbag nga aramid ti maingel a Pastor da ket ammudanto ti agyaman kenkuana iti agnanayon
awan inggana!”
