Iti daydi a kasasaad ti nakem ni Ibarra, saan a mabalin a makaturog; gapona, a tapno mailiwliwag ti nakemna ket mayadayo dagiti naliday a panpanunot a inda lumalo iti bayat ti rabii, napan nagaramid iti naiwaywayas a pagadalanna. Ti bigat nadanunna pay laeng a mamaglalaok ken mamagtitipon kadagidi ado a kitkita, iso a pangipadasanna no maan-anuda dagiti nagisgisla a kawkawayan ken sabsabali pay a banbanag a iti kalpasanna, inna ikabil kadagiti parparasko a nabilangan ken naripkan a nalaing.
Maysa nga ubing ti simbrek a nangipakaammo iti kaadda ti maysa nga agtaltalon.
—!Pastrekem! —kinunana, a di pay timmaliaw.
Simbrek ni Elias, iso a nagtatakder ket saan a nagtagtagari.
—!A! Pdakay gayam?—kinuna ni Ibarra iti sao ti tagalog, idi inna nabigbig;—pakawanenyo ta inkay ket pinagur-uray saan kay a nadlaw; adda ar-aramidek ngamin, a nasken unay . . .
—!Dikay kayat a singsingaen! — insungbat daydi agkabanuag a mangyurit;—immayak, umuna, ta saludsudek no adda kayatyo nga ibilin sadi Batangas, iso a papanak ita, ket maikadua, adda dakes a ipadamagko kadakayo . . .
Ni Ibarra nagsaludsudanna daydi mangyurit kadagiti matmatana.
—Ti anak ni Kapitan Tiago masakit, —innayon ni Elias a sitatalna,—ngem saan a nadagsen ti sakitna.
—!Ibutengko idin! —kinuna ni Ibarra a nakapoy ti timekna, —?ammuyo no ania ti sakitna?
—!Gurigor! Ita, no awan sabali nga ibilinyon...
—Agyamanak unay, gayyem ko; tarigagayak ti naimbag a pannagnayo . . . ngem, umuna pay, ipalubusyo a pagsaludsudankayo iti maysa; no saan a maitutop, diyo sungsungbatan.
Ni Elias nagtamed.
