- Agsublidanto pay met laeng
- dagiti salsallapingaw a nalmeng . . .
- (Bacquer)
- Agsublidanto pay met laeng
Kas nasao ni Lucas, ni Ibarra simmangpet iti sumuno nga aldao. Ti irnmuna a sinarungkaraima, iso ti balay ni Kapitan Tiago, a ti panggepna, iso ti inna panangkita ken Maria Clara ken inna panangibaga a ni Ilustrisima, ti Arsobispo, inkapiaanna met laengen iti Relijion; adda inkuyugna a maysa a surat a mangikalikagom kenkuana, nga agtungpal iti kura, surat a inkur-it met laeng dagiti im-ima ti Arsobispo'. Saan a bassit ti ragsak ni ikit Isabel iti kasdi, ta iso kayatna daydi bumaro ket dina anamungan ti pannaki-asawa ti kaanakanna ken Linares. Ni Kapitan Tiago, awan idi iti balay.
—Dumanunka, —kinuna daydi baket, iti sinankastilana; — Maria, ni don Crisostomo adda met langen iti grasia ti Dios; “dineslkumulgadon” ti Arsobispo.
Ngem daydi bumaro dina nabalinan ti immaddang, bimmalay ti isem kadagiti bibbibigna ket nagpukaw ti sao iti lagipna. Iti balkon, iti abay ni Maria Clara, adda a sitatakder ni Linares a mangur-urnos ken mamagtitipon kadagiti sabsabong ken bulbulong dagiti kumalkalatkat a mulmula: iti datar addada naiwarawara a sabsabong ti rosa ken sampaga. Ni Maria Clara, a si-idda a sisasadag iti dakkel a tugawna, sibebessag, sipapanunot, naliday ti ikikitana, abalbalayenna ti paypayna a marpil, a saan man unay a puraw a kas kadagiti nagimnos a ramramayna.
Idi nakitada ni Ibarra, bimsag ni Linares ket dagiti pingping ni Maria Clara limmabbagada a kas la karmin. Pinadasna titimmakder, ngem, piman ta awan pigsana, inbabana dagiti matmatana ket naibbatanna ti paypayna.
