dagiti kukkukua a tinawidmi iti daydi apomi a lakay. Nagbiagkam a sigagasat, ti kasakbayan innakam idi is-isman, aduda dagiti babaunen mi, dagiti taitalon mi nasayaat ti apitda, ket daydi
kabsatko nganngani makiasawa iti maysa a baro nga ay-ayatenna
ken mangay-ayat met kenkuana. Maipanggep iti sangkabassit
a riri gapo iti pirak, gapo iti kababalinko idi a natangsit, napagurak ti maysa nga adayo a kabagyanmi, ket naminsan nga
aldaw, inparupana kaniak ti nasipnget a naggapuak, ti nagpaiduma
dakes a kapuunak. Inpagarupko daydi, maysa a pardaya ket dinawatko a lawlawaganna; daydi tanem a nakaitabunan ti kasta unay
a buyok nagsubli a naglukat ket ti pudno limtuad a nangdadael
kaniak. Tapno adadda pay ti kinadaksanggasatmi, nabayag idi a
tawenen nga adda maysa a tagabo (kabadanganmi) a lakay, a
mangiturtured ken mangan-anos iti amin a dakes a sumipsiplot iti
ulok, ngem dina kam man ket kayat a panawan, ket isuna la nga
agsangit ken agsaibbek iti let-ang ti nalaos nga angaw dagiti dadduma a babaunenmi. Diak ammo no kasano ti pannakapalutpot
daydi kabagyak; ti naaramid, inna indatag daydi a lakay iti saklang ti tikom, ket inna pinagpalawag iti pudno; daydi lakay a
tagabo iso gayam ti amami, nga dumket ket di man sumina kadagiti ay-ayatenna nga annak, ket iso nga innak nagsasawan ken
kinabkabil iti namin-ado. Daydi gasat ken nam-ay mi nagpukawda, binaybay-ak dagidi kukkukuami, daydi kabsatko binaybay-an daydi mangas-asawa kenkuana, ket dakam nga aggaama
pimmanawkam iti ili a mapan agyanen iti uray sadinno a sabali
a disso. Ti pannakalaglagipna a nairaman a nakaigapo iti kinadaksanggasatmi, inyababana ti biag daydi lakay, iso a nakaammuak iti amin daydi nakalkaldaang a nalabes. Nabatikam a duddua iti daydi kabsatko.
“Iso nagsangit iti napalalo, ngem iti let-ang ti kasta unay a rigat a nagtataruptop kadakami, saanna a nalipatan daydi ayatna. Nakitana daydi nangas-asawa kenkuana a nakikallaysa iti sabali, a di ket nagsenna-ay, awan uray la no maysa a sao nga inna inyesngaw, ket siak innak nakita a nangin-inot a nagsakit a diak man la nabalin a naliwliwa. Naminsan nga aldaw nagpukaw; nagbanbannugak la a nangsapsapol kenkuana iti amin a di mangan-ano, nagbanbannugak la a nangsalsaludsod kenkuana; idi
kuan, iti kalpasan ti innem a bulan, naammuak a kadagidi nga
