met nga agkurang iti ili tayo; ti paringgor Na iso ti paringgor ti
wayawaya!
Maysa nga ulimek a nadeggang ti simmaruno kadagitoy a sasao. Ket idi, daydi bangka, a di madmadlaw a idurduron dagiti daldaluyon, umas-asideg iti igid. Ni Elias iso ti imnauna a nangguped iti ulimek.
—¿Ania ti ibagak kadagiti nangibaon kaniak? —sinaludsudna, a binaliwanna ti timekna.
—Nasaok kadakayon: leddaangek unay ti kasasaadda, ngem agurayda, ta ti dakes saan a maagasan ti sabali dakes, ket itoy a kinadaksanggasat tayo, datay amin adda basol tayo.
Ni Elias saan a simmungbaten; intamedna iti ulona, intuluyna ti naggaod, ket idi nakadanunda iti igid, nagpakada ken Ibarra, a kinunana:
—Agyamanak unay, apo, iti ayatyo a nangdengdengngeg ka niak; iti paglainganyo met laeng, dawatek kadakayo nga iti kasakbayan indak lipaten ket saandak a bigbigbigen iti uray no ania a kasasaad a inkay pakasaraknn kaniak.
Ket idi nasauna toy, sinublianna a ginaudan ti bangka nga inturungna iti maysa a nasamek a disso iti igid. Iti bayat daydi naunday a panaglasat, nagtaginayon a siu-ulimek; kasla awan sabali nga inna makita no di dagidi rinibribo a di-diamante nga akupen ti gaod ket inna met la isubli ti danaw, iso nga inda pagpukawan iti let-ang dagiti balbag a palpallon.
Idi kuan, nakagtengen; maysa a tao ti rimuar iti nasamek ket immasideg kenkuana.
—¿Ania ti ibagak iti Kapitan? —sinaludsudna. —Ibagam kenkuana a ni Elias, no di umuna a matay, tungpalennanto ti saona, —insungbatna a sililiday. —No kasta, ¿kaanunto ngarod ti ititiponmo kadakami? —Inton kuna ti Kapitanyo a dimtengen ti kanito ti peggad.
—¡Naimbag, Kasta ngaruden, innakon!
—¡No diak umuna a matay! —indayamudom ni Elias.
