iti bayat ti rabii, naglemmengda a sibubuteng. Ti kasla pirak a
lawag ti bulan inna nayunan ti kinaliday ken kinamaymaysa.
Iti butengna a makasabat iti guardia sibil, simbrek kadagiti minuymuyungan ken minulmulaan, iti maysa kadagitoy kasna nailasin ti anniniwan ti dua a tao; ngem intuluyna ti nagna, ket, kalpasan ti inna pananglayawlayaw kadagiti al-alad ken kabkabiti, dimmanon, a kasta unay rigatna iti maysa nga igid ti pagilian, ket nagturong iti balay ni Crisostomo. Iti ruangan addada dagiti ubbingna, nga inda pagsasaritaan ken ay-ay-ayen ti pannakatiliw ti apoda.
Idi naammuanna ti naaramid, ni Elias immadayo, linawlawna ti balay, linayawna ti alad a kabiti, kimmalay-at iti tawa ket simb rek iti pagadalan, iso a yan a sisesegged pay laeng daydi kandela a pinanawan ni Ibarra.
Ni Elias nakitana dagiti pappapel ken pagpagbasaan: nasarakanna dagiti ig-igam ken naisupot a pirpirak ken balbalitok. Binukelna iti ulona ti naaramid sadiay, ket idi ta makitana ti kasta unay nagado a pappapel a makaisarsarak, kinayatna ida nga inarikumkom, ipuruak iti tawa, sananto ida ikali.
Kimmita iti minuyungan, ket iti lawag ti bulan, adda nataldiapanna a dua a guardia sibil nga agturong ket adda pay maysa a katulungan da sumilsilap dagiti baybayoneta ken kapkapasete da.
Iti kasdi, natinungna ti aramidenna: binuntunna dagiti luplupot ken pappapel iti tengnga ti siled, inbukbukna kadakuada ti petroleo a segden ti maysa a pagsaingan, sana sinilmutan. Inbarikesna a sipapardas dagiti ig-igam, nakitana ti ladawan ni Maria Clara, nagngata . . . inkabilna iti maysa kadagiti supsupot, binagkatna ida, sa nagtapuak iti tawa.
Kanitona idin; dagiti guardia sibil agpilitda a sumbrek.
—¡Pauliendakami ta inkam alaen dagiti pappapel ni apoyo!— kinuna ti direktorsilio.
—¿Adda palubosyo? No awan, saan kay a umuli, —kinuna ti maysa a lakay.
Ngem dagiti sosoldado inda pinaglisi iti bin-ig a kulata, immulida iti agdan . . . ngem napuskol nga asok ti namungon iti amin ti balay ket dadakkel a gilgil-ayab ti apoy ti agruar iti salas, a mangdilpat kadagiti ru-ruangan ken tawtawa.
—¡Apoy, apoy! ¡Uram! inpukkawda amin.
