Idi kuan, ni Apo Mugna inna met la pinadanon ti bigat iti daydi napabutngan a ili.
Ti lansangan a yan ti kuartel ken ti tribunal awan pay laeng ti matataona ket adda pay la a siwawayas; dagiti balbalay awan ipadlawda a tanda ti biag. Nupay kasta, aglukat, a kasta unay ringgorna, ti rikep a kayo ti maysa a tawa, ket adda tumarnmidaw a ulo ti maysa nga ubing, nga awan la ti dina taliawen, yunnatna ti tengngedna ket kitaenna amin a di mangan-ano... ¡plas! ti kasdi nga aweng ipakdaarna ti pannakaidekket ti maysa a lalat a nakurti iti nasadiwa a kudil ti tao; ti ngiwat ti ubing agmusiig, dagiti matmatana agkidemda, agpukaw, ket ti tawa agsubli a mairikep.
Ti tuladen nairugin; ti panaglukat ken panagrikep daydi tawa, awan duadua nga adda nakangngeg, ta sabali a tawa ti si-inayad a naglukat, ket timmammidaw a si-a-annad unay ti ulo ti maysa a baket, kuribetbet ket awan ngipenna: iso ni ermana Pute, daydi baket a kasta unay ringgorna idi madama nga agsersermon ni Padre Damaso. Dagiti ub-ubbing ken babbaket isuda ti pannakabagi ti kinausisa ditoy daga; dagiti immuna gapo iti ayat da a makaammo, ket dagiti maikadua iti ayat da met a makalagip.
Awan duadua nga awan makaitured a mangsinelas kenkuana, ta agbayag man, kumita iti adayo, a pinagkuribetbetna dagiti kidkidayna, agmalugumog, tumupra a kasta unay ringgor, sa agugis. Ti bumalay adda iti sango, lukatanna met a sibubuteng ti may sa a tawa a bassit, ket rumuar ti ulo ni ermana Rufa, daydi madi a mangallilaw ket madi met a pa-allilaw. Isuda a dua agkinnitada iti apagbiit, umisemda, agpinnatulduda ket sublianda man ti agugisen.
¡Jesus! jkas la maysa a misa de grasia, maysa a kastilio! kinuna ni ermana Rufa.
