tartaraken simmaruno dagiti sumagmamano nga ububbing a rutayrutayan, nagkikibinda nga umas-asideg a sibubuteng iti kuartel; idi kuan, sumagmamano a babbakct a nagdalungdong iti
panio a naisiglot iti timidda, nagiggemda iti dadakkel a kuentas,
nga aginlulualo tapno palabasen ida dagiti sosoldado. Idi makitada a mabalin ti magna, a di mapaltugan, iso di nangrugi a nagruar dagiti lallaki, a kas la itay dida ibibbibiang ti naaramid; idi
damona, saanda a makaadayo iti sango dagiti balbalayda, ket
inda apru-aprusan dagiti manmanok da; idi kuan, pinadasda ti
immadayo bassit, a daytay inda sumardesardeng, ket kasta ti inaramidda inggana iti dida nakadanon iti sango ti tribunal.
Iti kalpasan ti maysa nga apagkapat ti maysa nga uras, sabalin dagiti sasao nga agwarwaras. Ni Ibarra ken dagiti ubbingna kinayatda kan a intaray ni Maria Clara, ket ni Kapitan Tiago, a tinulungan dagiti guardia sibil, inna inkaluya.
Ti bilang dagiti natnatay saan a sangapulo ket uppaten, no di ket tallo pulo; ni kan Kapitan Tiago nasugat, ket iti daydi met la nga aldaw nagawid sadi Manila agraman kabbalayna.
Ti idadateng ti dua a kuadriliero a nangbaklay iti tarimbang a yan ti maysa a bangkay, ket sinaruno ida ti maysa a guardia sibil, napalalo ti pinataudna nga aligagget. Naammuanda a naggapuda iti konbento; iti kita dagiti saksakana nga aguy-uyaoy, adda maysa a nangbalabala no siasinno; iti ad-adayo bassit, inbagadan no siasinno, iti ad-adayo pay, dagiti natnatay immaduda, ket naaramid ti misterio ti Santisima Trinidad; idi kuan, naulit a naaramid ti milagro a yaado dagiti tintinapay ken ik-ikan, ket dagiti natnatay, tallo pulo da ket walon.
Iti maikapito ket gudua nga uras, idi nagdadateng dagiti sabsabali a guardia sibil, a naggapo kadagiti kaparanget a il-ili, da giti agwarwaras a sasao nalawagdan ket inbagada aminen.
—Kagapgapok iti tribunal, iso a nakakitaak a sibabalod da don Filipo ken don Crisostomo,—kinuna ti maysa a lalaki ken ermana Pute; nakasaritak ti maysa kadagiti kuadriliero nga agbantay. Ni Bruno, nga anak daydi natay a minalmaluda, inbagana amin idi rabii. Kas ammuyo, ni Kapitan Tiago yasawana ti anakna iti daytay bumaro a kastila; ni don Crisostomo, gimmura, kinayatna ti bimmales, ket pinanggepna a papatayen amin dagiti kakastila, agraman pay ti kura; idi rabii, sinerrekda ti kuartel ken
