Nagasat ket di ken ermana Pute, ta simmangpet nga agtartaray ti maysa a balasangda, a kasta unay a buteng ken bessagna, ket iso ti nangguped iti sinnungbat dagidi agasawa.
—¡Adda nagbekkel iti uneg ti inaladan ti karruba tayo!kinunana nga agal-al-al.
—¡Adda nagbekkel!—kinunada amin a sipupunno iti aligagget.
Dagiti babbai nagugisda; awan nakakuti iti yanda.
—Wen, apo,—intuloy daydi balasang da nga agtigtigerger;— innak kuma agala iti sili. . . kimmita-ak iti alad ti karruba ta kitack no adda... ket nakakitaák metten iti maysa a tao a maipalpallayog; inpagarupko no ni Teó, tay ubingda, a kanayon a mangmangted kaniak iti . . . immasidegak a mapan . . . agala iti sili, ket nakitak metten a saan a iso, no di ket sabali, maysa a natay; iso tay nagtarayakon, nagtarayakon, ket . . .
—Intayon kitaen,—kinuna daydi lakay, a timmakder;—itulnugnakami.
—¡Dika mapmapan! —inyikkis ni ermana Pute, ket inggawidna ti badona; —¡adda maaramid kenka a dakes! ¿nagbekkel? ¡dakdakes man kenkuanan!
—Bay-annak ta innak kitaen, baket; inka idiay tribunal, Juan, ta inka ibaga; nalabit saan pay a natay.
Ket napan iti inaladan, a sinaruno ti balasangda, iso nga aglemlemmeng iti likudan ti lakay: dagiti babbai ken ni pay ermana Pute simmarunuda, a sipupunno iti buteng ken gagar.
Addaydiay, apo.—kinuna daydi balasang, a nagsardéng, ket inna intudo. Dagidi napan, nagsardengda iti napipia a kaádayo. ket binav-anda daydi lakay a maymaysa nga immasideg.
Maysa a bagi ti tao a naibitin iti sanga ti maysa a santol, ti maipalpallayog sagbabassit, a gapo iti pul-oy. Kinita daydi lakay iti nabayag bassit; kinitana dagiti saksakana a kimsiwen, dagiti taktakiagna, ti aruatenna a narugiten, ti ulona a naligsayen.
—Ditay rebbeng a sagsagiden inggana iti saan a dumteng dagiti agtuturay,—kinunana iti napigsa a timek:—timmángkenen; nabayag a natayen.
Dagiti babbai nangin inutda nga immasideg.
—Iso daytay karruba nga agyan iti daydiay balay a bassit,
