daytay duddua a lawasna pay la a dimteng; kitaenyo dayta piglat
ita rupana.
—¡Abe-Maria!—kinuna dagiti dadduma a babbai.
—¿Ilualuantay ti kararuana? —sinaludsod ti maysa a balasang idi malpasna a makita ken maámiris.
—¡Ang-ang, ereje! —kinuna ni ermana Pute, ¿dika ammo ti saó ni Padre Dámaso? Sasairuen ti Dios no ilualuan ti maysa a nalpasen a nainpierno; ti mangpapatay iti bagina, mainpierno a di sumama; iso ti gapona a saan a maitabón iti daga a sagrado.
Sana innayon:
—Kunakon ket a dayta a tao, dakes ti inna pagbanagan; saan ko la a napalutpot no ania ti pagbibiagna.
—Namindua a nakitak a nalisarsarita iti sakristan mayor, kinuna ti maysa a balasang.
—¡Saan ngata a napan nakisáo a gapo iti ayatna nga agkonpesar wenno mangted iti misa!
Immarayat dagiti karkarruba, ket ado a tattao ti nanglawlawen iti bangkay nga agpalpallayog pay laeng. Idi nalpas ti maysa a kagudua ti uras, dimteng ti maysa nga alguasil, ti direktorsilio, ken dua a kuadrilieros; dagitoy inda inbaba ket inkabilda iti maysa a tarimbang.
—Gumanat dagiti tattao a matay,—kinuna a nagkatawa ti direktorsilio, idi ta inna ik-ikkaten ti pagsurat a naisigpit iti lapayagna.
Nagsaludsod kadagitay makakulkol, pinagpalawagna daydi balasang a inna ikagkagumaán a ulaw-ulawen, babaen ti inna panangkita kenkuana iti dakes a ikikita, wenno inna butbutngen, wenno inna pagbalbalinen a sinauna ti dina met sinaó, a kasta unay ta idi agangayen, nagsangit daydi babai, ta ipagarupna nga inda ibalod, ket nanungpalanna, inna inpalawag a saan a sili ti inna sapulen, no di ket... ket pinagsaksina ni Téo.
Idi madama dagitoy a maár-aramid, maysa a taga talon a nagkallugong iti dakkel ket inti tengngedna adda baredbed a dakkel,inna inam-amiris ti bangkay ken daydi tali.
Ti rupa ti natay saan a limmitem ngem ti amin ti bagina; iti ngatuen ti nakabekkelanna, adda dua a garadgad ken dua a babassit a lammá a naglitem; ti nakayusa-usan ti tali, puraw ket
awan darána. Daydi nausisa a taga talon inamirisna a nalaing ti
