gapo iti daydi dakes nga angin, ket naipapilit a inurayda a nasukatan.
Iti apagapaman a lawag ti maysa a kandela, addada makita a langlanga ti tao: addada si-aárakop kadagiti tumtumengda ket inlemengda kadagiti nagbabaetan dagiti ul-uloda, addada na- kapakleb, addada nakatakder, a simmango iti kabiti, kdmpy. Adda nangngeg a reppa-ak ken ranatrat, a napakuyugan iti sapata: luktanda gayam ti pangaw (sepo).
Ni dunia Consolación inkubbuna bassit iti sango ti bagina, inyunnatna ti tengngedna, dagiti naruar a matmatana addada a silalansa iti apagbingngi a ruangan.
Iti nagbaetan ti dua a soldado rimuar ti maysa a langa a nakalidliday, ni Társilo, ti kabsat ni Bruno. Nakawaran dagiti im-imana; ti aruatenna, a napigispigis, ipakitana dagiti nabaneg a taktakiagna. Dagiti matmatana inkitana ida a sitatangsit iti asawa ti alperes.
—Daytoy iso ti napalalo unay ti ingelna a nakirupak ket iso ti nagbilin nga agtaray dagiti kakaduada, —kinuna ti alperes ken Padre Salvi.
Iti likudanna, inruarda ti maysa a tao, a kitana ti daksanggasat, agun-unnoy ket agan-anug-og a kas la maysa nga ubíng; agpilpilay ket ti kalsonna, dara-dara.
—Kaásiandak, apo, kaásiandak! ¡diakto subsublianen ti sumbrek iti patio!-ipukpukkawna.
—Nasikap daytoy,—kinuna ti alperes iti kura;—kinayatna ti nagtaray, ngem nasugat ti luppona. Dagdagitoy duddua dagiti adda a sibibiag.
—Ania ti naganmo?—sinaludsod ti alperes ken Társilo.
—Társilo Alasigan.
—¿Ania ti inkari kadakayo ni Don Crisóstomo tapno rautenyo ti kuartel?
—Ni Don Crisóstomo saan a nakisasaó kadakami, uray kaano man.
—¡Saanmo nga ilibak! Iso ti gapona á kinayatdakam a kinellaát.
—Marirukayo; pinatayyo iti bin-ig a pangpang-or daydi ama
mi, inbalesmi, ket awan sabalin. Sapulenyo dagidi dua a kakaduayo.
