soldado, nga agal-al-al, inbabana ti imana; ti alperes, a sibebessag iti pungtot ken siddaáw, pinatulduanna dagiti sosoldadona tapno inda paruk-atan.
Ni Dunia Consolación, idi kasta, timmakder, ket adda inyarasaásna iti asawana. Toy pinagkutina ti ulona a pinangipakitana iti annugotna.
—Ilemmesyo ita bubon! —kinunana:
Dagiti Pilipino ammuda ti kayat a sawen toy; iti saó ti tagalog, timbain, kunada. Dimi ammo no asinno ti nangiparuar iti daytoy a pagdusa, ngem kunami a nalabit, nabayag unayen. Ti pagsasao a "ti pudno rumuar iti maysa a bito", nalabit, maysa a nalais a pakaiturunganna.
Iti tengnga ti patio ti tribunal iso ti yan ti lusob ti bubon, batbato a nabiag ket nagubsang ti pannakaaramidna. Maysa a binut-tunan a kawayan ti pagtawingda iti danom a napigket, narugit ken nabungsot. Amin a madadael a pagtawing, amin a rugit ken sabsabali pay a kita ti danom agtitipunda sadiay, ta daydi a bubon kas la maysa a pagbaludan; sadiay amin ti pakaipuruakan ti ania man a di kayat dagiti tattao wenno kunada nga awan pagpaáyanna; ti matnag iti unegna, uray no kasano ti kinasayaatna, nalpas a napukawen. Nupay kasta, kaano man di ket magaburan: no dadduma, pasaray madusa dagiti balbalod a mangkaras ken mangikaadalem kenkuana, saan a gapo iti ayat nga adda imbag a maala iti daydi a dusa, no di ket gapo iti rigat a ited ti kasta nga aramid: ti balod a maipan iti unegna iti maminsan, makaala iti sakit a iti kaaduanna iso ti ipatayna.
Ni Társilo, a silalansa dagiti matmatana inna kitkitaen amin dagiti sagsagana dagiti sosoldado; napalalo a bessagna ket dagiti bibbibigna agpigpigergerda, wenno nalabit mangitanamitimda iti maysa a kararag. Ti kinatangsit daydi na-awananen iti inanama kasla itay nagpukawen, wenno kimmapoy. Namin-ado nga indumugna ti natibker a tengngedna, inkitana dagiti matmatana iti daga, a sindadaánen nga agitured.
Inpanda iti abay ti lusob, a sinaruno ni dunia Consolación, iso nga umis-isem. Maysa nga ikikita a naapal ti inturong daydi awanan gasat iti yan dagidi nabunton a bangbangkay ket maysa nga asog ti rimuar iti barukongna.
—¡Agsaukan! —sinubli a kinuna kenkuana ti direktorsilio;
