iti mata dagiti ado a tattao, a siuulimek; ti angin iso ti mamagtigerger kenkuana iti lamin.
—¿Kayatmo ti agsao?—sinaludsudda kenkuana.
—¡Sika kad la ti makaammon itay kabsatko a balasang!—
indayamudom daydi awanan gasat, a kinitana nga umar-a-raraw ti maysa kadagiti kuadriliero.
Daydi pagtawing a kawayan, nagrinni-it manen ket daydi madusdusa nagsubli manen a nagpukaw. Ni dunia Consolación napaliiwna a ti danom sitatalna. Ti alperes bimmilang iti maysal a minuto.
Idi insublida nga inaón ni Társilo, nagkukot ti baginan ket limmitemen. Kimmita kadagiti si-sasango ket inmulagatna dagiti matmatana, napunnuda iti dara.
—¿Agsaukan? —sinubli a sinaludsod ti alperes, a napukawen ti anepna.
Ni Társilo inwingiwingna ti ulona ket insublida man intaneben. Dagiti kalkalob dagiti matmatana mangrugrugida nga agkidemen, dagiti matmatana sikikitada sadi langit, iso a pagkalkallutangan dagiti puraw a ul-ulep; intamedna ti tengngedna tapno inna pay la makita ti lawag ti aldaw, ngem iti nabiit naitaneb iti danom, ket ti lubong inna kenkuana liningdanen daydi nagpaiduma iti kadakes nga abbóng.
Napalabas ti maysa a minuto; ti Musa, a sipapaliiw, nakitana dagiti dadakkel a burburek nga agpangato iti rabaw iti danom.
—¡Mawáw!—kinunana, a nagkatawa.
Ket ti danom nagsubli a nagtalna.
Ita, nagbayag daydi iti maysa a minuto ket gudua, ket ti alperes pinaggarawna ti imana, nga inda aunen.
—Ti bagi ni Társilo saan a siku-kukuten; dagiti apagbingngi a kalkalob dagiti matmatana ipakitada ti puraw dagiti bukbukel dagiti matmatana; iti ngiwatna adda agruar a danom a napitak ket adda pay maikuykuyog a dara; ti nalamiis nga angin agpuyupoy, ngem ti bagina saan nga agpigergeren.
Isuda amin nagkikinnitada a siuulimek, sibebessag ken sibubuteng. Ti alperes inpatulduna nga inda ikkaten ti pannakaibitinna, ket immadayo a sipapanunot; ni dunia Consolación namin-ado nga inna indepdeppel kadagiti silalamulamo a gurgu-
