apaman a nakitana ni katuganganna, a puon ti dakes a gasatna.
Ni Albino, daydi nagseminarista, nareppet met a kas kadagidi dua a singin ni Kapitana María. Dagitoy tallo a babbaro natalna ket naranga dagiti ruprupada. Ti naudi a rimuar, iso ni Ibarra,
saan a nareppet, ngem nagbaetan ti dua a guardia sibil... Daydi bumaro, sibebessag; simmapol iti maysa a rupa a pagayam.
Ni dayta iso ti adda basolna, inyikkis ti ado a timek; —ni dayta iso ti adda basolna, ket saan a nareppet!
—Ti manugangko awan inar-aramidna ket sikakawar dagiti im-imana!
Ni lbarra timmaliaw kadagiti guardiana:
—¡Reppetendak, ngem reppetendak a nalaing, pagdekketenyo lagiti siksikok! kinunana.
—Awan bilin kadakami!
¡Reppetendak!
Dagiti sosoldado nagtungpalda.
Ti alperes nagparang a sikakabayo, nakaigam amin dagiti lima a sosoldado a di mangan-ano.
Tunggal maysa kadagiti balod addaán sadiay iti mapanmangidawat kenkuana, mangsangit kenkuana, ken mangipakuyog kadagiti kadudungwan a nagnagan. Ni laeng Ibarrá ti kakaisuna nga awanan, ni pay Nior Juan ken ti mangisursuro, nagpukawda.
—Ania kad ti inaramid kadakay ni asawak ken toy anakko? —kunkuna kenkuana nga agsangsangit ni Doray; — kitaenyo kad toy nakaka-asi nga anakko! jinakkalyo man ni amana!
Ti ladingit dagiti tattao nagbalin a gura iti daydi bumaro, nga indarumda nga iso ti akinggapuan iti daydi a kibor. Ti alperes inbilinna a magnadan.
—¡Sika, maysaka a takrot! —inpukkaw ken Ibarra ti katugangan ni Andong. —Idi madama a makikabkabil dagiti dadduma gapo kenka, sika napanka naglemmeng, ¡takrot!
—Ilunudka! —kinuna ti maysa a lakay a simmurot kenkuana;—¡ilunudko ti kinabaknang a inur-urnong dagidi naganannak kenka, iso a nangdadael iti talnami! ¡Ilunuddaka, ilunuddaka!
—¡Bitayendaka kuma, ereje! —inyikkis ti maysa a kabagyan
