Kadagiti konkonbento napalalo ti garaw. Maipakat dagiti luglugan, dagiti Probprobinsias agsisinnarungkarda, addada na- limed a panagsasaritada. Mapanda kadagiti palpalasio a mangigayat iti tulongda iti Turay nga agpeggad unay. Nasasaó manen dagiti banbandos, paspasagid, panpannukit, kdmpy.
—¡Maysa a Te Deum, maysa a Te Deum¡ —kunkuna ti maysa a praile iti maysa a konbento. ¡Ita, awan agkurang iti koro! ¡Saan a bassit a kinaimbag ti Dios ti inna panangipakita ita, nangruna kadagitoy napalalo nagdakes nga al-aldaw, iti kinapategtayo!
—Iti daytoy a naáramid, kagkagatenna ngata dagiti bibbibigna ni Sinan Jeneral "Dakes a Gasat",— insungbat ti sabali.
—¿Ania ngata ti nagbalbalinanna no awan dagiti praile?
—Ket tapno nasaysayaat pay ti intay panangrambak iti naaramid, maibaga iti ermano kosinero ken iti prokurador...... Gaudeamus! Agrambaktayo iti uneg ti tallo nga aldao!
—¡Amen! jamen! ¡Biba Salvi! ¡Biba! Iti sabali a konbento, sabali met ti inda sarsaritaen.
—Makitayo? ¡Ni dayta, maysa nga inadalan dagiti jesuita; ti Ateneo iso ti taudan dagiti pilibustero! —kunkuna ti maysa a praile.
—Ken dagiti kabusor ti Relijion.
—Kunak pay la idi; dagiti jesuita dadaelenda ti Ili, dadaelenda dagiti agtutubo; ngem baybay-anda la ida gapo ta addada pappapel a kur-ikur-itanda, no agginggined. . .
—Ket ammo ti Dios no kasano ti pannakaaramidda!
Wen, inka man ida salungasingen! No awan ti di magunggon ken aggaraw, ¡siasinno ti agsurat iti kas la kinaraykay ti manok! Awan, ni Padre Secchi . . .
Ket umisemda a silalais unay.
—¿Ngem, dagiti dawdawel? Ken dagiti bagbagyo? —saludsuden met ti maysa, a napalalo ti lais ti panagsaona;— ¿saan a nadiusan dayta?
—Uray siasino nga agkalkalap ammuna a padlesan!
—No ti agturay, maysa nga ang-ang. . . ¡ibagam kaniak no kasano ti panagyan ti ulom ket ibagakto kenka no kasano ti panagyan ti sakam! Ngem, kitaenyunto no di agtitinnulong met
la dagiti aggagayyem: dagiti pagpagiwarnak ngannganida la dawaten a maikabil a obispo ni Padre Salvi.
