—¡Kunak ngamin kenka idin! -intuloy daydi babai, nga agung-unget; —¡kunak ngamin kenka idin! ¡ay, Birjen del Carmen, ay!
—¡Ket no awan met inbagbagam kaniak! —naitured a insungbat ni Kapitan Tinóng a makasangsangit;—sabali ket di nay ti inbagam kaniak, inbagam a naimbag no sansanek ti mapan iti balayna ken no gayyemek ni Kapitan Tiagó, gapo ta...gapo ta baknang...ket inbagam pay kaniak...
—¿Ania? ¿ania ti inbagak kenka? ¡Saanko nga inbagbaga kenka dayta, awan inbagbagak kenka! ¡Ay, no kuman dinengngegnak!
—¡Ita, siak ti pabasulem! —insungbatna, a timekna ti napait, ket sinipatna ti ima ti tugawna; —¿dika met kuna kaniak idi a naimbag ti inaramidko a nangawis kenkuana nga umay mangan ditoy, gapo ta baknang ket. . . kunam idi a saan tay a rebbeng ti makigayyem no di laeng kadagiti babaknang? ¡Ni!
—Pudno nga inbagak kenka dayta, gapo ta... gapo ta awan pamuspusanen; sika awan sabali nga aramidmo no di mangipadpadayaw kenkuana; don Ibarra ditoy, don Ibarra sadiay, don Ibarra iti amin a disso, ¡niii! Ngem siak, diak in- bagbaga kenka nga inka kitaen wenno kasarita iti daydi a tallaóng: toy saanmo a mabalin a libaken.
- —¿Ammok kadi a mapan met sadiay idi?
- —¡Rebengmo kuma nga ammuen!
- —¿Kasano, no diak pay met la am-ammo idi?
- —¡Rebbengmo kuma nga naammuan!
- —¡Ngem, Tinchang, no iso daydi ti immuna a pannakakitak kenkuana, iso daydi ti immuna a pannakangngegko iti
naganna!
—¡Rebbengna kuma a nakitam a immun-una, rebbengna kuma nga immuna a nangngegmo a pagsasaritaánda, ta iso ti gapona a lalakika, adda kalsonmo ket agbasbasaka iti "El Diario de Manila!" —insungbat, a di mabatabatan ti asawana, ket kinitana iti nakabutbuteng.
Ni Kapitan Tinóng awan inammuna nga insungbaten.
Ni Kapitana Tincháng saan la a napnek iti daydi a panagballigina, kinayatna a tinumtumek, ket inasitganna a sipepetpet dagiti gemgemgemna.
