VI
NI KAPITAN TIAGO
jMaaramid ti pagayatam ditoy daga!
Ita ta addada a matmaturog wenno mamigbigat dagiti intay sarsaritaen, intay sangwen ni Kapitan Tiago. Kaano man ditay napadayawan a inna inawis, iti kasta, awan ngad kalintegan wen no annong tayo a mangumsi kenkuana nga intay ket lipatenen, uray kadagiti kakanito a nasken unay.
Pandak, napudaw bassit, nagbukbukel ti bagi ken ti rupana yaman pay iti kasta unay a kinalukmegna, a kuna dagiti mangdaydayaw kenkuana nga aggapo sadi langit, ket dagiti kabbusorna kunada met a dara dagiti napanglaw, ni Kapitan Tiago kas la ub-ubing ti langana ngem ti pudpudno a tawenna: maipagarop nga agtawen laeng iti tallo pulo wenno tallo pulo ket lima. Kadagiti al-aldaw a masarsarita, ti rupana kanayon a langa ti nasingpet. Ti ulona nagbukel, bassit ket inabbungan ti buok a nangisit a kas la ballatinaw, atitiddag iti sango ket ababbaba unay iti likod, kunada nga ado ti naglaon iti unegna; dagiti matmatana a babassit, ngem saan met a inminsik, kaano man dida mabaliwan ti kayat da nga ibaga; ti agongna, naingpis ket saan a lepped, ket ti ngiwatna, no saan kuma a dinadael ti napalalo a panagtabako ken panagmama, a ti sapana a maummong iti maysa a pingpingna, dadaelenna ti kinasayaat ti rupana, mabalintay kuma a kunaen a naimbag ti panangipapan ken panagkunana nga iso, maysa a lalaki a nataer. Ngem uray adda daydi a kinalabes na, kanayon ket di a mataginayunna a napudaw dagiti ngipngipenna a naikasigud ken dagiti dua nga inted ti dentista, iti pateg a sangapulo ket dua a pisos ti maysa. Kunkunada nga iso ti maysa kadagiti kabaknangan nga addaan kukua sadi Binondo ken maysa kadagiti kangrunaan nga addaan dagdaga gapo kadagiti taltalon ken bangbangkagna sadi Pampanga ken Laguna de Bay, nangruna iti ili a San Diego
-35-
