ma amin ti balay, saanda a sinagid ti uray maysa la a buokmo.
Ngem, quod eventum, eventum; Gratias agamus Domino Deo quis
non in Marianis Insulis es, camotes seminando.(2)
Dagiti maár-aramid a kas ti naaramid ken Kapitan Tinóng saan a pagindidiammuan ni Kapitan Tiago. Daydi taó nalaos a yamanna, a dina ket ammo no asinno ti pudno a nakautanganna iti kasdi nga ayat. Ni ikit Isabel kunana a daydi, maysa a milagro ti Birjen de Antipolo, wenno ti Birjen del Rosario wenno ti Birjen del Carmen, wenno ti Birjen de la Correa; kenkuana, ti milagro saan a lumbes ditan. Ni Kapitan Tiago dina libaken ti milagro, ngem inna inayon:
-Patiek, Isabel, ngem saan ngata a ti laeng Birjen de Antipolo a maymaysa ti akinggapuan; dagiti gagayyem ko timmulungda ngata, iti manmanugangek, ni apo Linares, a kas ammumon, ang-angawenna pay ni apo Antonio Cánovas, daytay akinretrato iti naikabil iti "La Ilustración", daytay isuna la nga ipalubusna a makita dagiti tattao ti kagudua ti rupana.
Ket daydi naimbag a tao dina mapedped ti isemna nga isem ti makaáy-ayat tunggal adda mangngegna a napateg a damag maipapan kadagidi a naár-aramid. Ket saan ngamin a rabrabak daydi. Mayar-arasaas a ni Ibarra, mabitay; a numan pay ado ti pagkurangan dagiti masapol a pammaneknek tapno madusaán, iti udina, adda nasarakanda a mamasingked iti nakaidarumanna; a dagiti mannakaámmo inpalawagda a ti ma-ar-ramid a pagadalan pudno a mabalin a pagbalinen a maysa "Baluarte" a pagyanan ti soldado a makigubat, nupay saan unay a nasayaát. a ta ania kad ti mabalin a urayen kadagiti nakuneng a indio. Dagitoy a masasao isuda ti mámagtalna ken mangpaisem kenkuana.
Kas ti panagsupadi ti panangipapan ni Kapitan Tiago ken ni kasinsinna, dagiti gagayyemda nagkadua a bingay da met; ti maysa, mamati iti milagro, ket ti maikadua kunana nga aramid ti Turay, nupay dagitoy naudi saanda nga ado. Dagiti mamati a milagro daydi, nabingbingayda met: ti sakristan mayor sadi Binondo, ti agiaklako iti kandela ken ti pangulo ti kopradía inda kan nakita ti ima ti Dios a pinanggunay ti Birjen del Rosario; ti insik nga agkakandela ken mangmangted kenkuana iti kandela,
__________________
(2) Ti nalpas, nalpasen. Agyamantay ken Apo Dios, ta dika adda sadi
Puro Marianas nga agmulmula iti kamutig.
