Venimos precizamente a hablar con V. e la "Virgen",9 —insungbatna a sipapalimed ket intuduna ni María Clara; —tenemoz que hablar e negocioz. 10
Ti balasang naawatanna a rebbengna ti pumanaw; simmapol iti pambar ket immadayo, a kimmapkapet kadagiti tugtugaw. Dagiti nasasao ken nasarsarita itoy a panagsasangoda, napalaós a nagbaba ken nagkirmet, ket kaykayatmi a di saritaen. Umanayen a thaga nga idi nagpakadada, isuda amin siraragsakda, ket idi kuan, kinuna ni Kapitan Tiago ken ikit Isabel:
—¡Paibagam idiay ponda nga agdadayatay no bigat! Inka metten isagsagana ni María ta pagasawaentay iti mabiit.
Ni ikit Isabel kinitana a sikikigtot.
—¡Makitamto! ¡Inton manugangtan ni apo Linares, mauli ket maulugtanto dagiti amin a palpalasio; ap-apalandatanto, matmataydanto amin iti apal!
Ket iso ti gapona nga iti maikawalo nga uras ti rabii iti sumuno nga aldaw, napunino manen ti balay ni Kapitan Tiago, isuna laeng a ita, dagiti naaw-awis, bin-igda a kakastila ken ininsik; kadagiti babbai, addada nayanak sadi Espania ken sadi Pilipinas.
Sadiay, addada dagiti kaaduan dagiti am-ammotayo: ni Padre Sibyla, ni Padre Salvi ken sabsabali pay a pransiskano ken dominiko; daydi lakay a teniente ti Guardia Sibil, apo Guevara, nga adadda a nalidliday ita ngem idi; ti alperes a makapamenribo a sarsaritaennan ti pannakigubatna, ket inna kitkitaen amin a tattao iti ngatuen dagiti abagana, ta ipagarupna no maysa metten a "Don Juan de Austria"; itan, "teniente con grado de comandante"; ni De Espadania, iso a mangkitkita iti alperes a sidadayaw ken sibubuteng ket inna likliklikan a kaperreng; ken ni dunia Victorina a makalukluksaw. Ni Linares saan pay a dimteng, gapo ta iso, tao a napateg, maiparbeng a maud-udi a dumteng ngem dagiti dadduma: addada tattao a napalalo nagang-áng a no maudida iti maysa nga uras iti amin a banag, agbalinda a dadakkel a tattao.
Iti yan dagiti babbai, ni María Clara iso ti sarsaritaenda: daydi balasang inna ida kinablaáwan ken inawat a sidadayaw, a dina ket napukaw ti naliday a lingayna.
_____________________
:9 Umaykam ngarod ket makisarita kadakayo maipanggep iti "Birjen".
- 10 Adda umaymi isarita.
— 470 —
