—¡Psh!—kinuna ti maysa a balasang;—panangtangsiten
—Nalapsat met bassit;—insungbat ti maysa;—ngem ti mangasasawa kenkuana nabalinna kuma ti pimmili iti sabali a nakurkurang bassit ti kinaáng-áng ti rupana.
-Ti balitok, chika; ti naimbag a lalaki a mailako. Iti sabali a gunglo, kunkunada met:
-Maki-asawa, ita ta ti immuna a nobiona nganngani mabitay!
—Dayta ti naganek annad; adda dagos a mangsukat.
—Inton mabalo . . .
Dagitoy a sarsarita nalabit a mangmangngeg daydi balasang, iso a sirutugaw iti maysa a palangka, a mangur-urnos iti sangabandeja a sabsabong, ta makita man dagiti im-imana a mamigerger, bumsag ket namin-ado nga inna kagkagaten dagiti bibbibigna.
Iti met yan dagiti lallaki, ti panagsasaoda, napigsa, ket kas kadawyan, sarsaritaenda dagiti naudi a naar-aramid. Isuda amin agsauda, pati pay ni don Tiburcio, ni laeng Padre Sibyla ti saan. ta siuulimek iti nalais.
—Nangngegko a panawanyo ti ili, Padre Salvi?—sinaludsod ti baro a teniente, iso a pinagbalin a naay-ayat ti baro a bituenna.
—Awan aramidek sadiayen; umayak agindegen nga agnanayon ditoy Manila. . . ¿ket, dakayo?
—Panawak met ti ili,—insungbatna ket inlintegna ti bagi na; —Ti Turay masapulnak a mangidaulo kadagiti sosoldado a mangunor kadagiti il-ili a mángdalos dagiti probprobinsia ka dagiti piibustero.
Ni Fray Sibyla inna kinita iti napardas manipod saka inggana ulo, sana tinallikudan a naminpinsan.
—¿Ammokadin ti agpaypayso a banagen daytay kabesilia, ni daytay pilibusterilio?-sinaludsod ti maysa nga empleado.
—¿Ni Crisóstomo Ibarra ti kunayo? —sinaludsod met ti sabali. —Ti lablabitna ken mainumo unay, mabitay a kas dagidi pilibustero idi 72.
—¡Maibelleng!—kinuna a simamaga daydi lakay a teniente.
—Mailbelleng! ¡Maibelleng laeng! ¿Ngem, pannakaibelleng a inggana iti inggana!-kinuna dagiti dadduma a naggigiddan.
