—No daydiay a bumaro,—intuloy ni Teniente Guevara, a timek na ti napigsa ken naiget;—nagan-annad kuma bassit; no saan kuma unay a nagtaltalek kadagiti dadduma a tattao nga inna kinasinsinnurat; no dagiti pi-piskal dida kuma unay nalaing a mangiturong iti bagas dagiti sursurat, awan duadua a daydiay a bumaro inna kuma napalusutan.
Toy a palawag daydi lakay a teniente ken ti ayóg ti timekna pinagsiddaáwda iti napalalo dagiti agdengdengngeg, isuda a dida ammo ti inda isaó. Ni Padre Salvi timmaliaw iti sabali, nalabit tapno inna malisian ti naliday a ikikita kenkuana daydi lakay. Ni María Clara naibbatanna dagiti sabsabong ket saan a nakakuti. Ni Padre Sibyla, nga ammuna ti agulimek, kasla itay is-iso laeng ti makaámmo nga agsaludsod.
-¿Sursurat ti kunayo, apo Guevara?
-Sawek ti inbaga kaniak ti nangisakit kenkuana, iso a sipupudno ken si-aánep a nagtungpal iti annóngna. Malaksid dagiti sumagmamano a binbinnatog a di unay maáw-awatan, a insurat daydiay a bumaro iti maysa a babai kasangwanan ti ipapanna sadi Europa, binbinnatog a nakakitaan ti piskal iti gakat ken maysa nga ames iti Turay, ket iso inna binigbig nga agpaypayso a suratna, awan masarakan a pangidaruman kenkuana.
—¿Ket ti palawag daydi tulisan sakbay ti ipapatayna?
—Ti nangisakit iti bumaro inna pinagbalin nga awan pategna, ta, kas palawag met la daydi tulisan, uray kaano man saan da a nakisasaó kenkuana, no di laeng iti maysa a tao nga agnagan iti Lucas, iso a kabusorna, kas napaneknekan; ket toy a taó nagbekkel, nalabit gapo iti pammabantot ti nakemna. Nalawlawagan a dagiti pappapel a nasarakan iti bangkayna saanda nga agpaypayso, ta ti letra da umad-adas iti letra ni apo Ibarra idi maikapito a tawen pay laeng, ngem saán a kapada ti letrana ita, iso a mangted iti atap a ti nagtuladanda iso ti surat a nangidaróm kenkuana. Maysa pay, ti nangisakit kenkuana kunana, a no ni apo Ibarra dina kuma binigbig ti surat, ado kuma ti nabalin a pinangispal kenkuana; ngem idi inna nakita, bimsag, napukawna ti bileg ti nakemna ket inna pinasingkedan amin nga adda iti daydi a surat.
—Kunayo itay, —sinaludsod ti maysa a pransiskano, a dayta a surat naiturong iti maysa a babai, ¿kasano ti idadatengna iti ima
ti piskal?
